بیت المقدس میں فلسطینی کے چاقو سے وار سے یہودی آباد کار زخمی

(فلسطین نیوز۔مرکز اطلاعات) فلسطین کے مقبوضہ بیت المقدس میں ’’گویٹ زیو‘‘ یہودی کالونی کے مرکزی داخلی دروازے کے پاس ایک فلسطینی چاقو بردار کےچاقو کے وار سے کم سے کم ایک یہودی آباد کار کے زخمی ہونے کی اطلاعات ہیں۔ اسرائیلی پولیس نے فرار ہونے والے حملہ آور کو تعاقب کے بعد حراست میں لینے کا دعویٰ کیا ہے۔

رپورٹ میں بتایا ہے کہ یہودی آباد کار پر چاقو حملہ یہودی کالونی کے داخلی دروازے کےقریب ایک پٹرول اسٹیشن پر پیش آیا جب فلسطینی نوجوان نے ایک یہودی کو خنجر گھونپ دیا۔ یہودی آباد کار کو شدید زخمی حالت میں اسپتال منتقل کیا گیا ہے جہاں اس کی حالت تشویشناک بیان کی جاتی ہے۔

اسرائیلی پولیس کا کہنا ہے کہ انہوں نے حملہ آور کا تعاقب کیا اور اسے قریب ہی کھیتوں میں اسے حراست میں لے لیا گیا ہے۔

خیال رہے کہ پچھلے چار ماہ سے فلسطین میں جاری تحریک انتفاضہ میں چاقو سے کیے گئے حملوں میں 30 صہیونی ہلاک اور 350 سے زائد زخمی ہوچکے ہیں۔ پچھلے سال اکتوبر کے بعد 240 مزاحمتی حملے کیے گئے ہیں۔ ان میں 90 بار چاقو سے یہودیوں کو نشانہ بنایا گیا۔ 84 مرتبہ فائرنگ اور 20 بار گاڑیوں تلے کچلنے کے واقعات پیش آئے۔