(فلسطین نیوز۔مرکز اطلاعات) فلسطین کے مقبوضہ مغربی کنارے کے شمالی شہر طولکرم میں ذنابہ کے مقام پر اسرائیلی فوجیوں اور فلسطینیوں کے درمیان مسلح تصادم میں ایک صہیونی فوجی کے شدید زخمی ہونے کی اطلاعات ہیں۔ دوسری جانب صہیونی فوج نے تلاشی کی کارروائی میں 7 فلسطینیوں کو حراست میں لیا ہے۔
رپورٹ کے مطابق بدھ کو صہیونی فوج نے زنابہ کالونی میں اسرائیلی فوج نے تلاشی کی کارروائی شروع کی۔ اس دوران فلسطینی شہریوں اور اسرائیلی فورسز کے درمیان مسلح تصادم ہوا۔ صہیونی فوج نے زنابہ کالونی کا گھیراؤ کر کے اس کے تمام داخلی اور خارجی راستے بند کردیے اور کالونی کو فوجی علاقہ قرار دے کر فلسطینیوں کی ناکہ بندی کردی گئی۔
تفصیلات کے مطابق زنابہ کالونی میں اسرائیلی فوجیوں کی جانب سے گھر گھر تلاشی کی کارروائی شروع کی گئی تو اس کے جواب میں فلسطینی شہریوں نے فائرنگ کی۔ فائرنگ سے ایک اسرائیلی فوجی کے زخمی ہونے کی اطلاعات ہیں۔
تلاشی کی کارروائیوں میں قابض فوج نے سات فلسطینیوں کو حراست میں لینے کے بعد نامعلوم مقام پر منتقل کردیا ہے۔ تلاشی کا سلسلہ رات گئے تک جاری رہا۔ زخمی اسرائیلی فوجی کو بیلنسن اسپتال منتقل کردیا گیا۔