فلسطینی حکومت کے وزیر برائے ہاؤسنگ وآباد کاری مفید الحساینہ نے بتایا کہ ان کی حکومت نے کویت کی جانب سے دی گئی ہدایت کی روشنی میں تمام منصوبوں کے خاکے تیار کرنے کے بعد کویت کو آگاہ کردیا ہے جس کے بعد دونوں حکومتوں کے درمیان ایک ماہ کے اندر اندر معاہدے کا امکان ہے۔
رپورٹ کے مطابق مسٹر الحساینہ کا کہنا تھا کہ حکومت کے انجینیرنگ کے شعبے کی جانب سے تیار کردہ نقشوں کو جلد ہی کویت حکومت کے حوالے کیاجائے گا جسکے بعد کویت نے 200 ملین ڈالر کی رقم جاری کرنے کا وعدہ کیا ہے۔
فلسطینی وزیر کا کہنا تھا کہ کویت حکومت کی جانب سے غزہ کی پٹی میں سنہ 2014 ء میں مسلط کردہ اسرائیلی جنگ کے نتیجے میں ہونے والے نقصان کے ازالے کے لیے 200 ملین ڈالر کی رقم ادا کرنے کا اعلان کیا تھا۔ ان میں سے 75 ملین ڈالر کی رقم غزہ کی پٹی میں 2000 مکانات کی تعمیر پر خرچ کیے جائیں گے اور باقی رقم سے انفرااسکٹرکچر کے مختلف منصوبے اور سمندر کے کھارے پانی کو قابل استعمال بنانے کے ایک پروجیکٹ پر خرچ کیا جائے گا۔