مرکز اطلاعات فلسطین کی رپورٹ کے مطابق مغربی کنارے اور غزہ پر مشتمل فلسطینی علاقوں میں فلسطینیوں کی تعداد چوالیس لاکھ ہے جبکہ چودہ لاکھ سن 1948میں اٹہتر فیصد فلسطینی حصے پر قبضہ کر کے بنائی گئی نام نہاد اسرائیلی ریاست میں آباد ہیں۔
اسرائیلی مظالم سے تنگ آ کر عرب ملکوں میں آباد فلسطینیوں کی تعداد اکاون لاکھ جبکہ دنیا بھر کے دیگر ممالک میں مقیم فلسطینیوں کی تعداد چھ لاکھ پچپن ہزار ہو چکی ہے۔ اس طرح ستاون لاکھ ، پچپن ہزار فلسطینی اپنا وطن ہونے کے باوجود دیگر ملکوں میں پناہ گزیں ہیں۔
پیر کے روز جاری کردہ حکومتی اعداد و شمار کے مطابق کے مطابق فلسطینی علاقوں میں سے مغربی کنارے کی فلسطینی آبادی ستائیس لاکھ جبکہ غزہ کی پٹی کی سترہ لاکھ تک پہنچ گئی ہے۔ اپنے ہی ملک میں ہجرت کرنے والے افراد کی شرح 44.2 فیصد بنتی ہے۔ مغربی کنارے کی آبادی کا 41.4 فیصد اور غزہ کی آبادی کا 58.6 فیصد حصہ اپنے آبائی علاقے چھوڑ کر دیگر علاقوں میں رہائش اختیار کرنے پر مجبور ہے۔