انتہائی کم وسائل کے ساتھ غزہ میں سردی اور بارشوں کے اثرات کا مقابلہ کر رہے ہیں: شہری دفاع

غزہ – (روزنامہ قدس ـ آنلائن خبر رساں ادارہ) غزہ میں شہری دفاع کے ایگزیکٹو سپروائزر محمد ابو دان نے بتایا ہے کہ ادارے کے اہلکار غزہ کو اپنی لپیٹ میں لینے والے شدید سرد ہواؤں اور بارانی طوفان کے اثرات کا سامنا ایسے حالات میں تقریباً معدوم امکانات کے ساتھ کر رہے ہیں جب جنگ کے دوران زیادہ تر آلات اور گاڑیوں کو تباہ کر دیا گیا ہے، شہریوں کی مدد کی کالوں کا جواب دینے اور انہیں بچانے کے لیے ضروری سامان کی سخت ترین کمی ہے۔

ابو دان نے ایک پریس بیان میں واضح کیا کہ شہری دفاع کے عملے کو غزہ کی مختلف گورنریوں بشمول غزہ شہر، وسطی علاقے، خان یونس اور پٹی کے شمالی حصوں سے امداد کی سیکڑوں کالز موصول ہوئیں اور انہوں نے متاثرہ علاقوں کی ایک تعداد میں طوفان کے اثرات سے نمٹنے کی کوشش کی ہے۔

انہوں نے مزید کہا کہ عملے نے بعض مکانات کے جزوی طور پر زمین بوس ہونے کے واقعات سے نمٹا اور شہریوں کی ایک بڑی تعداد کو محفوظ مقامات پر منتقل کیا، جبکہ ساتھ ہی بارش کا پانی داخل ہونے اور جمع ہو جانے کے باعث خیمے مکمل طور پر ڈوب گئے۔

انہوں نے اشارہ کیا کہ ریسکیو ٹیموں نے متاثرین کی مدد کی تاکہ وہ پانی میں غرق ہونے والے خیموں سے اپنے بچوں اور ذاتی سامان کو باہر نکال سکیں، ساتھ ہی دستیاب امکانات اور اوزاروں کی شدید ترین کمی کے باوجود بارش کے پانی کی نکاسی کے لیے نالیاں کھودنا شروع کر دیں۔

ابو دان نے بیان کیا کہ شہری دفاع کے ادارے کی ملکیت میں موجود زیادہ تر آلات، بشمول پانی شفٹ کرنے والے پمپ اور نجات دہندگی کے دیگر آلات، جنگ کے دوران بمباری اور سفاکانہ تباہی کا نشانہ بن چکے ہیں، جبکہ بعض گاڑیاں انتہائی بوسیدہ ہو چکی ہیں اور دیگر گاڑیاں انہیں چلانے کے لیے ضروری تیل میسر نہ ہونے کے باعث بند پڑی ہیں۔

انہوں نے اس بات کی تصدیق کی کہ ادارے کی صورتحال انتہائی دشوار کن ہے، کیونکہ نقصان کی وسعت اور بڑھتی ہوئی ضروریات سے نمٹنے کے لیے ضروری امکانات تقریباً معدوم ہیں۔ انہوں نے خبردار کیا کہ بارشوں کا موسم جاری رہنے اور غزہ میں سردیوں کے داخل ہونے کے ساتھ حالات مزید پیچیدہ ہو جائیں گے۔

ابو دان نے انسانی حقوق کی تنظیموں بین الاقوامی برادری، پیس کونسل اور اقوام متحدہ کے نمائندے نکولے ملادی نوف سے اپیل کی کہ وہ شہری دفاع کے ادارے کے لیے خیمے، ترپالیں اور ضروری آلات داخل کرنے کے لیے کام کریں، تاکہ اس کا عملہ موجودہ حالات کے سائے میں اپنے فرائض سرانجام دینے اور شہریوں کی پکار کا جواب دینے کے قابل ہو سکے۔

انہوں نے اس بات پر زور دیا کہ پٹی ابھی موسم سرما کے آغاز میں ہے، جو بنیادی ڈھانچے کی تباہی اور ہزاروں بے گھر خاندانوں کی بارش اور سردی سے تحفظ و پناہ کے وسائل سے محرومی کے پیش نظر مزید انسانی اور میدانی چیلنجوں کا پیش خیمہ ہے۔

12 گھنٹوں کے دوران 70 ہزار خیمے غرقاب

اسی تناظر میں غزہ کے سرکاری میڈیا دفتر نے اعلان کیا ہے کہ پٹی کو متاثر کرنے والے بارانی طوفان کی وجہ سے اس کے اثرات شروع ہونے کے صرف 12 گھنٹوں کے اندر بے گھر افراد کو پناہ دینے والے تقریباً 70 ہزار خیمے ڈوب گئے ہیں، جبکہ اس طوفان کے اثرات سے ہونے والے ابتدائی نقصانات کا تخمینہ 30 لاکھ ڈالر کے قریب لگایا گیا ہے۔

سرکاری میڈیا دفتر نے اسرائیلی دشمن کو اس طوفان کے تباہ کن اثرات کی مکمل ذمہ داری کا حامل قرار دیا، کیونکہ اس نے گزرگاہوں کو مسلسل بند کر رکھا ہے اور پناہ گاہوں و بحالی کے بنیادی سامان کو داخل ہونے سے روک رکھا ہے جس کی آبادی کو فوری طور پر ضرورت ہے۔

اس نے بین الاقوامی برادری اور اقوام متحدہ و عالمی تنظیموں سے مطالبہ کیا کہ وہ فوری طور پر مداخلیت کریں، اپنی انسانی، قانونی اور اخلاقی ذمہ داریاں قبول کریں، اور موسم سرما کے آغاز کے ساتھ بگڑتی ہوئی انسانی صورتحال کے سائے میں بے گھر افراد کی زندگیوں کو بچانے اور ان کے لیے تحفظ و پناہ گاہ کے تمام تر لوازمات فراہم کرنے کے لیے عمل پیرا ہوں۔