غزہ میں اسرائیلی حملوں میں شدت، ایک فلسطینی شہید، متعدد زخمی

غزہ (روزنامہ قدس ـ آنلائن خبر رساں ادارہ) غزہ کی پٹی میں اسرائیلی حملوں اور جنگ بندی کی مسلسل خلاف ورزیوں کے دوران جمعہ کے روز ایک فلسطینی شہید جبکہ متعدد افراد زخمی ہوگئے۔

طبی ذرائع کے مطابق غزہ شہر میں ایک رہائشی اپارٹمنٹ کو نشانہ بنانے والے اسرائیلی فضائی حملے کے نتیجے میں ایک فلسطینی شہید ہوا، جبکہ ایک خاتون اور کم عمر بچی سمیت کئی افراد زخمی ہوئے جنہیں الشفا میڈیکل کمپلیکس منتقل کیا گیا۔

مقامی ذرائع کے مطابق اسرائیلی ڈرون نے وسطی غزہ شہر میں الیرموک اسٹریٹ پر تاج مال کے قریب حملہ کیا، جس کے بعد زخمیوں کو اسپتال لایا گیا۔

اسی دوران اسرائیلی فورسز نے غزہ شہر کے مشرقی علاقے التفاح پر فائرنگ کی، جبکہ مغربی غزہ میں المؤسسات اسٹریٹ پر ایک گھر کو ہیلی کاپٹر کے ذریعے نشانہ بنایا گیا۔ اسرائیلی بحریہ نے بھی غزہ کے ساحلی علاقے پر فائرنگ کی۔

شمالی غزہ میں اسرائیلی فوجی گاڑیاں جبالیہ کے علاقے الترنس کے قریب پیش قدمی کرتی رہیں اور شدید فائرنگ کی گئی۔ وسطی غزہ میں دیر البلح اور المصدر کے مشرقی علاقوں پر بھی اسرائیلی ہیلی کاپٹروں نے فائرنگ کی۔

جنوبی غزہ میں خان یونس کے شمال مشرقی علاقے القرارہ کو بھی اسرائیلی حملوں کا نشانہ بنایا گیا، جہاں ڈرون حملوں، ٹینکوں کی گولہ باری اور شدید فائرنگ کی اطلاعات موصول ہوئیں۔ اسی طرح رفح کے مغربی علاقوں پر بھی اسرائیلی توپ خانے نے شیلنگ کی۔

فلسطینی وزارت صحت کے مطابق گزشتہ 24 گھنٹوں کے دوران اسرائیلی حملوں میں مزید چار فلسطینی شہید اور 28 زخمی ہوئے۔ وزارت کے مطابق تین افراد حالیہ حملوں میں شہید ہوئے جبکہ ایک زخمی زخموں کی تاب نہ لاتے ہوئے دم توڑ گیا۔

وزارت صحت نے بتایا کہ متعدد شہداء کی لاشیں اب بھی ملبے تلے دبی ہوئی ہیں کیونکہ مسلسل بمباری اور خطرناک حالات کے باعث امدادی ٹیمیں متاثرہ علاقوں تک نہیں پہنچ پا رہیں۔

اعداد و شمار کے مطابق 10 اکتوبر 2025 کو جنگ بندی کے آغاز کے بعد سے اب تک 1,127 فلسطینی شہید اور 3,643 زخمی ہو چکے ہیں، جبکہ 800 لاشیں ملبے سے نکالی جا چکی ہیں۔

7 اکتوبر 2023 سے جاری اسرائیلی جارحیت میں مجموعی طور پر شہداء کی تعداد 73,250 جبکہ زخمیوں کی تعداد 173,751 تک پہنچ گئی ہے۔