غزہ – (روزنامہ قدس ـ آنلائن خبر رساں ادارہ) غزہ کی پٹی میں اتھارٹی برائے سرحدی گزرگاہ و حدود نے اعلان کیا ہے کہ رواں ماہ یکم مئی سے سات مئی سنہ 2026ء تک کے عرصے کے دوران رفح بری گزرگاہ اور کرم ابو سالم گزرگاہ کے ذریعے آنے اور جانے والے مسافروں کی کل تعداد 593 رہی۔
اتھارٹی نے جاری کردہ ایک رپورٹ میں واضح کیا ہے کہ گزرگاہوں کے ذریعے نقل و حرکت صرف دو دنوں تک محدود رہی، جس کے دوران رفح اور کرم ابو سالم گزرگاہوں کو جزوی طور پر کھولا گیا تھا۔
رپورٹ میں بتایا گیا ہے کہ غزہ کی پٹی سے باہر جانے والے مسافروں کی تعداد 343 تھی، جن میں سے 226 مسافروں نے جمہوریہ مصر کا رخ کیا جبکہ 117 مسافر اردن کی جانب روانہ ہوئے۔
دوسری جانب مئی سنہ 2026ء کے پہلے ہفتے کے دوران ان گزرگاہوں کے ذریعے 250 افراد غزہ پہنچے، جن میں مصر سے آنے والے 220 افراد جبکہ اردن سے آنے والے 30 افراد شامل تھے۔
قابض اسرائیل نے سنہ 2007ء سے غزہ کی پٹی کا محاصرہ جاری رکھا ہوا ہے، جبکہ اس وقت غزہ کی کل 24 لاکھ آبادی میں سے تقریبا 15 لاکھ فلسطینی قابض دشمن کی نسل کشی کی جنگ کے نتیجے میں اپنے گھروں کی تباہی کے بعد بے گھر ہو چکے ہیں۔
غزہ کی پٹی 8 اکتوبر سنہ 2023ء کو شروع ہونے والی قابض اسرائیلی جنگ کے آغاز سے ہی انسانی اور طبی حوالے سے انتہائی تباہ کن حالات کا سامنا کر رہی ہے، جس نے ہسپتالوں اور طبی مراکز سمیت تمام بنیادی ڈھانچے کو وسیع پیمانے پر تباہ کر کے رکھ دیا ہے۔
ایندھن اور طبی سامان کی فراہمی پر عائد سخت ترین پابندیوں کے ساتھ ساتھ ادویات اور بنیادی طبی آلات کی شدید قلت نے اس انسانی بحران کو مزید سنگین بنا دیا ہے۔
