غزہ – (روزنامہ قدس ـ آنلائن خبر رساں ادارہ) غزہ کی وزارت صحت نے اعلان کیا ہے کہ قابض اسرائیل کی جانب سے جاری فوجی جارحیت کے نتیجے میں گذشتہ 24 گھنٹوں کے دوران غزہ کے مختلف ہسپتالوں میں 3 فلسطینی شہداء اور 8 زخمی لائے گئے۔
وزارت صحت نے اپنےایک بیان میں بتایا کہ 11 اکتوبر کو ہونے والی سیز فائر کے بعد سے اب تک شہداء کی مجموعی تعداد 484 ہو چکی ہے جبکہ زخمیوں کی تعداد 1,321 تک پہنچ گئی ہے، اسی عرصے کے دوران ملبے سے نکالے گئے شہداء کی تعداد 713 ریکارڈ کی گئی ہے۔
بیان میں مزید کہا گیا کہ قابض اسرائیل کے وحشیانہ عدوان کے آغاز سنہ سات اکتوبر 2023ء سے اب تک مجموعی طور پر 71,657 فلسطینی شہید اور 171,399 افراد زخمی ہو چکے ہیں، جو فلسطینی قوم کے خلاف جاری منظم نسل کشی اور اجتماعی قتل عام کا کھلا ثبوت ہے۔
وزارت صحت نے خبردار کیا کہ اب بھی متعدد متاثرین ملبے تلے اور سڑکوں پر پڑے ہیں جبکہ قابض قوت کی جارحیت اور تباہی کے باعث ایمبولینس اور سول ڈیفنس کے عملے کو اس وقت تک ان تک رسائی حاصل نہیں ہو سکی، جو غزہ میں انسانی المیے کی سنگینی کو مزید آشکار کرتا ہے۔
