مقبوضہ القدس – (روزنامہ قدس ـ آنلائن خبر رساں ادارہ) سخت پابندیوں کے باوجود ہزاروں فلسطینیوں نے مسجد اقصیٰ مبارک اور اس کے صحنوں میں جمعہ کی نماز ادا کی۔ یہ اجتماع معراجِ رسول ﷺ کی یاد میں منعقد ہوا جہاں اہلِ فلسطین نے قابض اسرائیل کی جانب سے القدس شہر پر مسلط کردہ کڑی پابندیوں کو للکار کر اپنے دینی حق کا عملی اظہار کیا۔
قابض اسرائیلی فوج نے صبح کے ابتدائی اوقات سے ہی شہر کے اطراف قائم فوجی چوکیوں پر نمازیوں کی آمد پر سخت قدغنیں عائد کر دیں جبکہ بلدہ قدیمہ کے گرد اور مسجد اقصیٰ کے دروازوں پر لوہے کی رکاوٹیں نصب کر دی گئیں۔
قابض فورسز نے درجنوں نوجوانوں کو روک کر ان کی شناختی دستاویزات کی جانچ پڑتال کی اور کئی کو مسجد میں داخل ہونے سے روک دیا تاکہ نمازیوں کی تعداد کم کی جا سکے۔
اس کے مقابلے میں اندرونِ فلسطین کے مختلف قصبوں سے بسوں کے قافلے مسجد اقصیٰ کی جانب روانہ ہوئے تاکہ وہاں نماز ادا کی جائے اور رباط اختیار کیا جائے۔ یہ اقدام اس عزم کی تجدید تھا کہ مسلمان مسجد اقصیٰ تک رسائی کے اپنے حق سے دستبردار نہیں ہوں گے اور قابض اسرائیل اور آبادکاروں کی جارحیت کے سامنے ڈٹ کر اس مقدس مقام کا دفاع کریں گے۔
یہ منظر نامہ ایسے وقت سامنے آیا ہے جب گذشتہ دنوں کے دوران مسجد الاقصیٰ کے صحنوں میں قابض اسرائیل کی یلغار میں خطرناک اضافہ ہوا ہے۔ نام نہاد ہیکل کی حامی انتہا پسند جماعتوں نے قابض فوج کی سرپرستی میں بار بار اور وسیع پیمانے پر دھاوے بولے جو مسجد اقصیٰ کی حرمت کو پامال کرنے کی کھلی کوشش ہے۔
