(روز نامہ قدس ۔آنلائن خبر رساں ادارہ )بیسیوں گزرتے برس بھی فلسطینی خانہ بدوش قصبے کی قسمت نہ بدل سکے۔قابض صہیونی حکام کے ہاتھوں قصبہ 147 ویں بار مسمار کر دیا گیا۔
تفصیلات کےمطابق مسلسل بدقسمتی کی مثال النقب صحرا میں واقع فلسطینی قصبہ عراقیب ایک بار پھر اسرائیلی بلڈوزر کی بھوک کی زد میں آگیا جب گزشتہ روز اسرائیلی پولیس کی حفاظت میں متعدد اسرائیلی بلڈوزر نے قصبے پر دھاوا بول دیا اور اسکو 147 ویں بار مسمار کر دیا ۔
مقامی ذرائع کے مطابق عراقیب قصبے کا کوئی بھی گھر یا خیمہ اسرائیلی بلڈوزر کی دست برد سے محفوظ نہ رہا اور تھوڑی ہی دیر میں تمام گھر ملبے کا ڈھیر بن گئے۔
قابض پولیس کی اس بہیمانہ کارروائی کے بعد بچوں ، خواتین اور بزرگوں سمیت درجنوں خانہ بدوش شہری بے گھر ہو گئے اور اب نئے گھر بنانے سے پہلے صحرا میں موسم کی سختیاں برداشت کرتے رہیں گے۔
مقامی لوگوں کا کہنا ہے کہ یہاں کے رہائشی مسلسل خوف کی حالت میں زندگی گزار رہے ہیں کیونکہ ان کو ڈر ہے کہ نئے گھر تعمیر کرنے کے بعد کسی بھی وقت انکے گھروں کو دوبارہ مسمار کر دیا جائے گا۔