مقبوضہ بیت المقدس (روز نامہ قدس ۔آن لائن خبر رساں ادارہ) اسرائیل کی سیاسی جماعت ’’کحول لوان‘‘ کے سربراہ جنرل بینی گانٹز نے کہا ہے کہ ان کی جماعت 9 اپریل 2019ء کو ہونے والے پارلیمانی انتخابات میں وزیراعظم بنجمن نیتن یاھو کے ساتھ سیاسی اتحاد نہیں کرے گی۔
روز نامہ قدس کو موصول ہونے والی اطلاعات کے مطابق سابق آرمی چیف جنرل ریٹائرڈ بینی گانٹز نے صحافیوں سے بات چیت کرتے ہوئے ان خبروں کی سختی سے تردید کی کہ ان کی جماعت نیتن یاھو کے ساتھ انتخابی اتحاد کا ادارہ رکھتی ہے۔ بینی گانٹز نے کہا کہ نیتن یاھو کی جماعت سے انتخابی اتحاد سے متعلق جو چیزیں سامنے آئی ہیں، ان میں کوئی صداقت نہیں۔
ایک سوال کے جواب میں بینی گانٹز کا کہنا تھا کہ بنجمن نیتن یاھو کرپشن کیسز کا سامنا کر رہے ہیں۔ ان کے ساتھ سیاسی اتحاد کے قیام کے بارے میں نہیں سوچا جا سکتا۔
عبرانی ٹی وی ’’کے اے این‘‘ کے مطابق نیتن یاھو اور گانٹز نے سوشل میڈیا پر ایک دوسرے کے خلاف الزام تراشی کی ہے۔
بینی گانٹز نے نیتن یاھو پر سوشل میڈیا پر ہزاروں جعلی اکاؤنٹس سے اپنی انتخابی مہم چلانے کا الزام عائد کیا جب کہ نیتن یاھو نے ان الزامات کوجھوٹ کا پلندہ قرار دیا ہے۔