(روز نامہ قدس ۔آنلائن خبر رساں ادارہ )صور باھر میں فلسطینی شہریوں کے اسرائیلی انتظامیہ کے ہاتھوں اپنے گھروں کی مسماری کے خلاف مظاہرے جاری،اسرائیلی فوج نے مظاہرین پر آنسو گیس برسادی۔درجنوں فلسطینی زخمی حالت میں اسپتال منتقل کردیئے گئے۔
تفصیلات کے مطابق قابض صہیونی فوج نے اس وقت فلسطینی شہریوں پر آنسو گیس برسادی جب وہ اسرائیلی انتظامیہ کے ہاتھوں اپنے گھروں کی مسماری کے خلاف مظاہرے میں شریک تھے۔ یہ واقع وادی ال حمص میں پیش آیا۔آنسو گیس کی فائرنگ سے درجنوں فلسطینی زخمی ہوگئے۔
عینی شاہدین کے مطابق اسرائیلی فوج نے بھاری تعد اد میں گیس بم مظاہرین کی جانب پھینکے۔جس نے مظاہرین کو شدید متاثر کیا۔
مظاہرین کو زخمی حالت میں قریبی اسپتال منتقل کر دیا گیا۔
یاد رہے کہ اسرائیلی انتظامیہ نے تمام تر بین الاقوامی تنقید اور فلسطینیوں کے احتجاج کو بالائے طاق رکھتے ہوئے پانچ روزقبل مقبوضہ بیت المقدس کے نواح میں فلسطینیوں کے مکانوں کو مسمار کرنا شروع کردیا ہے۔پیر کی شام سیکڑوں اسرائیلی فوجی اہلکار بیت المقدس کے نواحی علاقے صور باہر میں بلڈوزر اور دیگر بھاری مشینری کے ہمراہ پہنچ گئے اور مکانات کی مسماری کا آغاز کر دیا ۔