اسرائیل غزہ میں ’’بڑے پیمانے پر آپریشن‘‘ شروع کرنے میں کسی تردد کا مظاہرہ نہیں کرے گا۔

مقبوضہ بیت المقدس (روز نامہ قدس ۔آن لائن خبر رساں ادارہ) اسرائیلی وزیراعظم بنیامین نیتن یاہو نے حماس کو خبردار کیا ہے کہ اسرائیل غزہ میں ’’بڑے پیمانے پر آپریشن‘‘ شروع کرنے میں کسی تردد کا مظاہرہ نہیں کرے گا۔

روز نامہ قدس کو موصول ہونے والی اطلاعات کے مطابق نیتن یاہو نے اتوار کو مقبوضہ بیت المقدس میں اپنی کابینہ کے ہفتہ وار اجلاس سے قبل کہا کہ ’’ غزہ میں حالیہ ’’اشتعال انگیزیوں ‘‘ میں ’’ بھوت ( روگ) دھڑوں کا ہاتھ کارفرما ہے لیکن اس کے باوجود حماس کو اس کی ذمے داریوں سے مستثنیٰ قرار نہیں دیا جاسکتا ‘‘۔

انھوں نے کہا کہ ’’ میں نے غزہ میں لوگوں کو یہ باتیں کہتے ہوئے سنا ہے کہ ہم چونکہ انتخابی میں مصروف ہیں ،اس لیے بڑے پیمانے پر کارروائی کا سوال ہی پیدا نہیں ہوتا ‘‘۔ان کا اشارہ اسرائیل میں 9 اپریل کو ہونے والے انتخابات کی جانب تھا۔

ان کا کہنا تھا :’’ میں نے حماس سے کہہ دیا ہے کہ وہ اس طرح کے تخمینے نہ لگائے ،ہم غزہ کی سرحد پر کمیونٹیو ں اور پورے جنوب کو خاموش کرانے کے لیے جو بن پڑا کریں گے‘‘۔