ترکی اسرائیلیوں کےلئے محفوظ ملک نہیں، اسرائیل

(روز نامہ قدس ۔آنلائن خبر رساں ادارہ ) اسرائیل کی جانب سے ترکی میں اپنے شہریوں کو خبردار کیا گیا ہے کہ ایران کی جانب سے ترکی میں موجود اسرائیلیوں کو نشانہ بنایاجاسکتا ہے۔

صہیونی ریاست اسرائیل کے وزیرخارجہ يائر ليپد کے دفتر سے ترکی  میں موجود اسرائیلی شہریوں کے لئے ایک سرکلر جاری کیا ہے جس میں بتایا گیا ہے کہ اسرائیلی شہریوں کوترکی میں ایران کی جانب سے نشانہ بنائے جانے کا خطرہ ہے۔
یہ بھی پڑھیے

اسرائیلی وزیرخارجہ آئندہ ماہ مراکش کا دورہ کریں گے

گذشتہ ہفتے اسرائیل نے 22مئی کوایران کی سپاہِ پاسداران انقلاب کے کرنل صیّاد خدائی کے قتل کے بعد ایران کے ممکنہ ’’انتقامی حملوں‘‘کے خطرے سے خبردار کیا تھا اور اپنے شہریوں کو متنبہ کیا تھا کہ وہ ترکی کے غیرضروری سفر سے گریز کریں۔

ترکی میں  موجود اسرائیلیوں کو درپیش ممکنا  خطرے کے پیش نظر وزیرخارجہ يائر ليپد  اسی موضوع پرترک حکام سے بات چیت کے لیے آئندہ ہفتے ترکی کا دورہ کریں گے جہاں وہ ترک ہم منصب مولود شاوش اوغلو سے ملاقات کریں گے۔ترک وزیرخارجہ نے اقتصادی تعاون کو وسعت دینے کی کوششوں کے تحت گذشتہ ماہ اسرائیل کا دورہ کیا تھا۔ اسرائیل کے سرکاری نشریاتی ادارے کان ریڈیو نے گذشتہ ہفتےخبردی تھی کہ سکیورٹی حکام نے مئی ترکی میں اسرائیلیوں کو نشانہ بنانے کے لیے ایران کے مبیّنہ حملے کو ناکام بنا دیا تھا۔ انقرہ نے اسرائیلی انتباہ کا جواب دیتے ہوئے اس بات پر زوردیا تھا کہ ترکی ایک محفوظ ملک ہے اوراس کے پاس دہشت گردی سے نمٹنے کے لیے تعاون کا طریق کار موجود ہے۔