(روزنامہ قدس ۔آن لائن خبر رساں ادارہ) یوسف الحساینہ نےکہا کہ ترک صدر نے فلسطینیوں کے قاتل کو دعوت دیکر اپنا منافقانہ چہرہ دنیائے اسلام کے سامنے پیش کردیا اور عرب ممالک کی طرح ترکی بھی اب فلسطینیوں کے ساتھ غداری اور خيانت کا مرتکب ہو گیا ہے۔
عالمی ذرائع ابلاغ کے مطابق ترکی کے صدر رجب طیب اردگان کی جانب سے صہیونی ریاست اسرائیل کےساتھ نئے تعلقات استوار کر نے کےلیے صہیونی صدر اسحاق ہرزوگ کو ترکی میں خیر مقدم کر نے کو فلسطینی تنظیم جہاد اسلامی اور تحریک حماس نے غیر تعمیری اور فلسطینیوں کی پشت میں خنجر گھونپنے کے مترادف قرار دیا ہے۔
فلسطینی تنظیم جہاد اسلامی کے رکن یوسف الحساینہ نےاپنے بیان میں ترک صدر کے اس اقدام کی مذمت کرتے ہوئے کہا ہے کہ رجب طیب اردگان نے فلسطینی عوام اور فلسطینی بچوں کے قاتل کو ترکی میں دعوت دیکر اپنا منافقانہ چہرہ دنیائے اسلام کے سامنے پیش کردیا ہےاور دیگر کئی عرب ممالک کی طرح ترکی بھی اب فلسطینیوں کے ساتھ غداری اور خيانت کا مرتکب ہو گیا ہے۔
دوسری جانب ترکی کے غیر سرکاری اداروں نے اسرائیلی صدر کے دورہ ترکی کی شدیدالفاظ میں مذمت کی ہے اور صدر اردگان کی طرف سے اسرائیلی صدر کی میزبانی کے اقدام کوفلسطینیوں سمیت مسلم امہ کے ساتھ ظلم اور منافقت قراردیا ہےجبکہ ایک ترک نشریاتی ادارے ملی گزٹ نے بھی اسرائيل کے صہیونی صدر کے دورہ ترکی پر شدید رد عمل کا اظہار کرتے ہوئے اسحاق ہرزوگ کےدورے کو قاتل انقرہ پہنچ گيا”کا عنوان دیا ہے اور لکھا ہے کہ ” فلسطینی بچوں کے قاتل ترکی پہنچ گئے”جبکہ ترک صدر رجب طیب اردگان کو مخاطب کرتے ہوئےکہا ہے کہ انہوں نے فلسطینی عوام اور بچوں کے قاتل صہیونیوں کو بھائی قراردیکر فلسطینیوں کے زخموں پر نمک چھڑک دیا ہے۔