صہیونی وزیر اعظم نے اپنا دورہ بھارت ملتوی کر دیا

(روزنامہ قدس ۔آن لائن خبر رساں ادارہ) نفتالی بینیٹ کے کورونا وائرس میں مبتلا ہونے کی وجہ سے ان کا دورہ بھارت جو 3 سے 5 اپریل کے درمیان طے پایا تھا ملتوی ہوگیا ہے۔
ذرائع سےموصول ہونے والی مصدقہ معلومات کے مطابق قابض ریاست اسرائیل کے صہیونی وزیراعظم نفتالی بینیٹ جو آئندہ ہفتے بھارت کےساتھ 30 سالہ سفارتی تعلقات مکمل ہونے پر ترقی کی نئی راہیں ہموار کر نے کیلیے بھارتی وزیر اعظم نریندر مودی کی خصوصی دعوت پر بھارت آنے والے تھےان کی جانب سے اچانک عالمی وباء کورونا وائرس سے متاثر ہونے کے بعد یہ دورہ بھارت ملتوی کر دیا گیا ہے۔
بھارت میں صہیونی ریاست کے سفارت خانے کی جانب سے ترجمان نےاپنے بیان میں واضح کیا ہے کہ نفتالی بینیٹ کے کورونا وائرس میں مبتلا ہونے کی وجہ سے ان کا دورہ بھارت جو 3 سے 5 اپریل کے درمیان طے پایا تھا ملتوی ہوگیا ہےجس کے بعد اب صہیونی وزیر اعظم کی صحت یابی پر ہی یہ دورہ بھارت مکمل کیا جائے گا۔
واضح رہے کہ قابض صہیونی وزیراعظم نفتالی بینیٹ اور بھارتی وزیر اعظم نریندر مودی کے درمیان اقوام متحدہ کی ماحولیاتی کانفرنس کے دوران پہلی ملاقات ہوئی تھی جہاں نریندر مودی نے انہیں بھارت کے سرکاری دورے کی دعوت دی تھی تاہم کورونا وائرس سے متاثر ہونے کے بعد صہیونی وزیر اعظم کا اب یہ دورہ کب ہو گا اس کے لئے ابھی کسی نئی تاریخ کا اعلان نہیں کیا گیا ہے۔