(روز نامہ قدس ۔آنلائن خبر رساں ادارہ ) پاکستان گزشتہ روز محصور غزہ کے لوگوں کے خلاف اسرائیلی قابض فوج کی جانب سے انسانیت کے خلاف سنگین جرم کی بھرپور مذمت کرتا ہے جس میں ایک پانچ سالہ بچی سمیت دس افراد شہید اور درجنوں زخمی ہوئے ہوئے ہیں۔
پاکستان سینیٹ کی ڈیفنس کمیٹی کے چیئرمین مشاہد حسین سید نے اپنے ویڈیو پیغام میں مقبوضہ فلسطین کے محصور شہر غزہ پراسرائیلی دہشتگردی اور وحشیانہ بمباری کی شدید الفاظ میں مذمت کرتے ہوئے کہا ہے کہ غاصب ریاست اسرائیل کےحوالے سے پاکستان ہمیشہ سے ایک مضبوط غیر متذلزل اور دوٹوک موقف رکھتا ہے ،بانی پاکستان قائد اعظم محمد علی جناح نے ہمیشہ سے فلسطین کے حوالے سے واضح اور دوٹوک موقف اپنا یا انھوں نے فلسطینیوں پر اسرائیلی ناجائز قبضے کی مذمت کی اور فلسطینیوں کی ہر موقع پر حمایت کی ، بانی پاکستان نے اس وقت فلسطین پر ناجائز اسرائیلی قبضے کے خلاف امریکی صدر اور برطانیہ کے وزیراعظم کو خطوط بھی لکھے تھے۔
یہ بھی پڑھیے
غزہ پر اسرائیلی فضائیہ کے حملے، خواتین بچوں سمیت دس سے زائد شہید ، متعدد زخمی
چیئرمین ڈیفنس کمیٹی کا کہنا تھا کہ پاکستان ابتدائی وقت سے ہی اس بات سے قطع نظر کہ فلسطین میں کس کی حکومت بنتی ہے مظلوم فلسطینیوں کے ساتھ کھڑا ہے مقبوضہ فلسطین کے حوالے سے پاکستان کی پالیسی وہی ہے جو بانی پاکستان قائد اعظم محمد علی جناح کی پالیسی تھی مسئلہ فلسطین پر پاکستان میں مکمل قومی اتفاق رائے ہے ۔