(روزنامہ قدس ۔آن لائن خبر رساں ادارہ) دفترخارجہ نے عالمی برادری پر زور دیاکہ اقوام متحدہ کی سلامتی کونسل کی متعلقہ قراردادوں اور کشمیر کے عوام کی خواہشات کے مطابق تنازع جموں و کشمیر کے منصفانہ اور پرامن حل کے لیے اپنا بھرپور کردار ادا کرے۔
تفصیلات کے مطابق وزارت خارجہ کی جانب سے مقبوضہ جموں و کشمیر میں رمضان المبارک کے تقدس کو پامال کرتے ہوئے بھارتی قابض افواج نے مزید 4 شہریوں کو ماورائے عدالت قتل کیا جس کی شدید مذمت کرتے ہیں۔
دفتر خارجہ سے جاری بیان کے مطابق بھارتی قابض فوج کی جارحانہ کارروائیوں کے نتیجے میں رواں ہفتے کے دوران مقبوضہ جموں و کشمیر کے ضلع شوپیاں میں نام نہاد محاصرے اور تلاشی کے دوران نہتے کشمیری نوجوانوں کا قتل انسانی حقوق اوربین الاقوامی قانون کی کھلی خلاف ورزی ہے جس کا عالمی برادری نوٹس لے۔
بیان کے مطابق پاکستان نے ایک بار پھر 2018 اور 2019 کی کشمیر رپورٹس میں اقوام متحدہ کے ہائی کمشنر برائے انسانی حقوق کے دفتر کی سفارش کے مطابق کمیشن آف انکوائری کے ذریعے مقبوضہ جموں و کشمیر میں ماورائے عدالت قتل کی تحقیقات کے لیے اپنے مطالبے کا اعادہ کیااورعالمی برادری پر زور ڈالا وہ کہ اقوام متحدہ کی سلامتی کونسل کی متعلقہ قراردادوں اور کشمیر کے عوام کی خواہشات کے مطابق تنازع جموں و کشمیر کے منصفانہ اور پرامن حل کے لیے اپنا بھرپور کردار ادا کرے۔
بیان میں مزید کہا گیا کہ مقبوضہ کشمیر میں مظالم کاسلسلہ کشمیری عوام کو دہشت زدہ کرنے کی بھارت کی مکروہ پالیسی کی عکاسی کرتا ہےتاہم ان تمام تر بھارتی مظالم و بربریت کے باجود بہادر کشمیری نوجوان اپنے منصفانہ حق اور مقصد کے لیے پوری طرح پرعزم ہیں اور کوئی بھی ظلم ان کے مضبوط عزم کو کمزور اور متزلزل نہیں کر سکتا۔