غزہ پر اسرائیلی دہشتگردی جاری: صرف 2 روز میں 45 فلسطینی بچے شہید، یونیسف

یونیسف کے بیان میں کہا گیا ہے کہ یہ اعداد و شمار اس ہولناک حقیقت کی نشاندہی کرتے ہیں کہ غزہ کے بچے سب سے زیادہ اذیت، بھوک اور بمباری کا سامنا کر رہے ہیں، اور روزانہ کسی نہ کسی المناک سانحے کا شکار ہو رہے ہیں۔

بیان میں مزید کہا گیا ہے: "یہ ایک اور تباہ کن یاد دہانی ہے کہ غزہ میں بچے سب سے پہلے اور سب سے زیادہ مصائب جھیل رہے ہیں، وہ بھوکے سوتے ہیں اور ہر لمحہ اندھا دھند حملوں کا شکار ہوتے ہیں۔” یونیسف نے بچوں کی ہلاکتوں کو فوری طور پر روکنے کا مطالبہ کیا ہے۔

ادھر عالمی ادارۂ صحت ڈبلیو ایچ او نے بتایا ہے کہ غیر قانونی صیہونی حملوں نے غزہ کے صحت کے نظام کو مفلوج کر دیا ہے۔ خان یونس کا یورپی ہسپتال بند ہو چکا ہے، جس سے نیورو سرجری، دل کے امراض اور کینسر جیسے اہم علاج معطل ہو گئے ہیں۔

غزہ کی وزارت صحت کے مطابق خون کی شدید قلت ہے اور عام شہری خود غذائی قلت اور کمزوری کے باعث خون کا عطیہ دینے سے قاصر ہیں۔

یہ مسلسل انسانی المیہ عالمی ضمیر کو جھنجھوڑنے کے لیے کافی ہے۔ عالمی برادری کی خاموشی اس ظلم میں ایک طرح کی شراکت بن چکی ہے۔