(روزنامہ قدس ۔آن لائن خبر رساں ادارہ)صیہونی ریاست اسرائیل کے خلاف برسرپیکار مزاحمتی تحریک اسلامی جہاد کی طرف سے جاری ایک بیان میں کہا گیا ہے کہ کوئی بھی فلسطینی تنظیم دفاع قبلہ اول سے دست بردار نہیں ہوسکتی۔
بیان میں ریاستی سرپرستی میں مسجد اقصیٰ کی مسلسل بے حرمتی کے اشتعال انگیز عمل پر شدید تشویش کا اظہار کرتے ہوئے خبردار کیا ہے کہ قبلہ اول کی بے حرمتی اور یہودی آباد کاروں کے دھاوے آتش فشاں بن کر پھٹ سکتے ہیں جس کی لپیٹ میں آکر بڑا نقصان ہوسکتا ہے ۔
صیہونی ریاست اسرائیلی کی حکومتی سرپرستی میں مسجد اقصیٰ پر شرپسند یہودی آبادکاروں کے اشتعال انگیز دھاوے، اور مقدس مقامات کی بے حرمتی کسی بڑے نقصان کا باعث بنے گی۔
بیان میں جماعت نے فلسطینی قوم کے تمام دھڑوں پر زور دیا کہ وہ قبلہ اول کے دفاع کے لیے اپنی صفوں میں اتحاد پیدا کریں، قبلہ اول کا دفاع نہ صرف فلسطینی قوم کی اجتماعی ذمہ داری ہے بلکہ یہ پورے عالم اسلام کی ذمہ داری ہے۔ فلسطینی قوم قبلہ اول کے دفاع کے لیے ہرقربانی دینے کے لیےتیار ہے۔بیان میں خبردار کیا گیا ہے کہ مسجد اقصیٰ پر یہودی آبادکاروں کے اشتعال انگیز دھاوے مقدس مقام کے تقدس کو پامال کرنے کی دانستہ سازش ہیں جس کےنتیجے میں فلسطینی قوم میں سخت غم وغصہ پایا جا رہا ہے۔
اسلامی جہاد کا کہنا ہے کہ اسرائیلی ریاست دائیں بازو کے مذہبی انتہا پسند یہودیوں کے ہاتھوں میں یرغمال ہوچکی ہے۔ یہودی مذہبی گروہ آباد کاروں کو آئے روز قبلہ اول پردھاووں کے لیے ترغیبات دیتے ہیں۔