(روزنامہ قدس ۔آن لائن خبر رساں ادارہ) صیہونی زندان میں بغیر کسی جرم کے قید چار فلسطینی قیدیوں کی طویل احتجاجی بھوک ہڑتال جاری ہے۔
فلسطینی محکمہ امور اسیران کے ترجمان حسن عبد ربہ کے مطابق اسرائیلی جیل میں بناء کسی جرم ، مقدمے اور سماعت کے انتظامی قید کے تحت گرفتار چار فلسطینی باشندوں نے احتجاجااپنی بھوک ہڑتال جاری رکھی ہوئی ہے جن میں قیدیوں میں اسماعیل علی کی بھوک ہڑتال کے 100 دن مکمل ہوگئے ہیں۔
ترجمان کا کہنا ہے کہ انتظامی قید کی پالیسی کے تحت زیر حراست اردنی شہری ھبہ اللبدی کو بھوک ہڑتال کے باعث تشویشناک حالت میں الرملہ اسپتال منتقل کیا گیا ہے۔اسیر عبداللہ الجابر جنہیں 20 سال قید کی سزا کا حکم دیا گیا ہے گذشتہ تین دن سے بھوک ہڑتال جاری رکھے ہوئے ہیں۔ اس کے علاوہ اردن کے اسیر عبدالرحمان مرعی کینسر کا شکار ہونے کے باوجود صہیونی جیل میں قید ہیں۔فلسطینی اسیران سنٹر برائے اسٹڈیز کے مطابق انتظامی اسیران میں سے کچھ کو اپنی بھوک ہڑتال کی وجہ سے صحت کے مسائل کا سامنا کرنا پڑ رہا ہے مگر پھر بھی ان کے حوصلے بلند ہیں۔