(روزنامہ قدس ۔آن لائن خبر رساں ادارہ) شرپسند صیہونی آبادکاروں کی جانب سے حکومتی سرپرستی میں فلسطینی بستیوں اور فلسطینی باشندوں پر حملے جاری ہیں ، حملوں میں فلسطینی املاک کی توڑپھورٹ سمیت فلسطینی باشندوں کو زخمی کرنے کے متعدد واقعات شامل ہیں۔
مقامی ذرائع کے مطابق گزشتہ روز شرپسندصیہونی آبادکاروں کے ایک گروہ نے مقبوضہ مغربی کنارے میں جنین شہر کے جنوب میں واقع سیلیہ الظھر قصبے پر حملہ کیا اور فلسطینی باشندوں کی ملکیت گاڑیوں اور گھروں پر پتھراؤ کیا ، گاڑیوں کے شیشے توڑ ڈالے جبکہ گھروں اور کھڑکیوں کو نقصان پہنچایا ۔
شرپسند آبادکاروں نے فلسطینی کار سوار خاندان پر بھی پتھراؤ کیا جس کے نتیجے میں السیلاوی خاندان کے افراد زخمی ہوگئے جبکہ گاڑی کو نقصان پہنچا ، صیہونی آبادکاروں نے فلسطینی خاندان کی گاڑی بھی ہتھیالی اور فرار ہوگئے ۔