(روزنامہ قدس ۔آن لائن خبر رساں ادارہ) صدی کی ڈیل کے خلاف فلسطین کےمختلف علاقوں میں فلسطینی طلباء نے امریکی سازش کے خلاف احتجاجی مظاہرے کئے ،صیہونی فوج نے مظاہرین کو منتشر کرنے کیلئے آنسو گیس اور ربڑ کی گولیوں کا استعمال کرتے ہوئے متعدد فلسطینیوں کو زخمی کردیا۔
مقامی ذرائع کے مطا بق امریکی صدر ڈونلڈ ٹرمپ کی جانب سے تیار کردہ نام نہاد امن منصوبہ صدی کی ڈیل کے خلاف غرب اردن کے جنوبی شہر الخلیل ، العروب پناہ گزین کیمپ، جنین ، نابلس اور مقبوضہ فلسطین کے مختلف علاقوں میں احتجاجی مظاہرے کئے گئے جس میں سیکڑوں طلباء اور دیگر شعبہ جات زندگی سے تعلق رکھنے والے افراد نے شرکت کی ۔
مظاہرین نے امریکی صدر اور اسرائیل کے خلاف نعرے بازی کی اور سڑکیں بلاک کیں ،صیہونی فوج نےمظاہرین کو منتشر کرنے کیلئے آنسو گیس اور ربڑ کی گولیوں کا استعمال کرتے ہوئے متعدد فلسطینیوں کو زخمی کردیا جبکہ درجنوں فلسطینی آنسو گیس کے باعث بے ہوش ہوگئے ۔
عینی شاہدین کا کہنا ہے کہ آنسوگیس کی شیلنگ اس قدر زیادہ تھی کہ اس سے اردگرد کی آبادی میں گھروں میں مقیم لوگ بھی بے ہوش ہوگئے جنہیں فوری طورپر اسپتال منتقل کیا گیا۔خیال رہے کہ امریکا کی طرف سے جاری کردہ صدی کی ڈیل کے منصوبے کے خلاف فلسطین بھر میں احتجاجی مظاہرے جاری ہیں۔