مقبوضہ بیت المقدس (روز نامہ قدس ۔آن لائن خبر رساں ادارہ) اسرائیلی ریاست کی جانب سے بعض ممالک پر سفارت خانے تل ابیب سے القدس منتقل کرنے کے لیے دباؤ ڈالنے کی پالیسی پرعمل درآمد جاری ہے۔
روز نامہ قدس کو موصول ہونے والی اطلاعات کے مطابق اسرائیلی وزیراعظم بنجمن نیتن یاھو نے کہا ہے کہ وہ برازیل پر سفارت خانہ بیت المقدس منتقل کرنے کے لیے دباؤ ڈالیں گے۔
نیتن یاھو نے کہا کہ برازیل کی حکومت نے بیت المقدس کو اسرائیل کا دارالحکومت تسلیم کرنے کا اعلان کیا تھا مگر بعد میں فیصلہ واپس لے لیا تھا۔ ہم برازیل کے نو منتخب صدر حافییر بولسونارو پر دباؤ ڈالیں گے کہ وہ القدس کو اسرائیل کا دارالحکومت تسلیم کرنے کے اپنے اعلان پرعمل درآمد یقینی بنائیں۔
عبرانی اخبار ’’یدیعوت احرونوت‘‘ کےمطابق نیتن یاھو نے بولسونارو سے ملاقات سے قبل ایک پریس کانفرنس سے خطاب میں کہا کہ وہ جلد ہی حافییر بولسونارو کے ساتھ ملاقات کریں گے۔ انہیں امید ہے کہ برازیلی صدر کے ساتھ ان کی ملاقات تاریخی ہوگی۔ برازیل سفارت خانہ بیت المقدس منتقل کرنے کا اعلان کرچکا تھا مگر اس نے بعد میں فیصلہ تبدیل کر دیا تھا۔
خیال رہے کہ نیتن یاھو دسمبر 2017ء سے امریکا کی جانب سے مقبوضہ بیت المقدس کو اسرائیل کا دارالحکومت تسلیم کرنے کے بعد عالمی برادری پر امریکا کی پیروی کرنے کے لیے دباؤ ڈال رہے ہیں۔