مقبوضہ بیت المقدس (روز نامہ قدس ۔آن لائن خبر رساں ادارہ) اسرائیل نے دعویٰ کیا ہے کہ اسلامی تحریک مزاحمت (حماس) کے ہیکروں نے غرب اردن میں فوج کے بارے میں معلومات کے حصول کے لیے سائبرحملہ کیا تھا تاہم اسے ناکام بنا دیا گیا۔
روز نامہ قدس کو موصول ہونے والی اطلاعات کے مطابق اسرائیلی اخبار ’’یسرائیل ھیوم‘‘ نے اپنی رپورٹ میں بتایا کہ حماس کے ہیکروں نے اسرائیلی فوج کے مانیٹرنگ سسٹم پر سائبر حملہ کیا تھا جسے ناکام بنا دیا گیا ہے۔
خبر رساں ادارے ’’صفا‘‘ کے مطابق اگرحماس کا سائبرحملہ کامیاب ہوجاتا تو غرب اردن میں کیمروں کی مدد سے اسرائیلی فوج کسی قسم کی معلومات حاصل نہ کرسکتی۔
اس کےعلاوہ سائبرحملے کی کامیابی کی صورت میں اسرائیلی فوج کی آپریشنل کارروائیوں میں رکاوٹ پیدا ہوجاتی اور فوج کی نقل وحرکت میں بھی مشکلات درپیش آتیں۔
اسرائیلی فوج کے ایک عہدیدار ’’نوعام شاعر‘‘ کا کہنا ہے کہ حماس کی طرف سے سائبرحملے بدستور جاری ہیں۔حال ہی میں حماس کی طرف سے فوج کے مانیٹرنگ نظام پر ایک بڑا سائبرحملہ کیا گیا جسے ناکام بنا دیا گیا۔