مقبوضہ بیت المقدس (روز نامہ قدس ۔آن لائن خبر رساں ادارہ) اسرائیلی وزیراعظم بنجمن نیتن یاھو نے کہا ہے کہ خلیجی ریاست اومان نے اپنی فضاء اسرائیل کے طیاروں کے لیے استعمال کرنے کی اجازت دے دی ہے۔ ان کا کہنا ہے کہ اومان کی طرف سے فضاء استعمال کرنے کی اجازت ملنے کے بعد اسرائیل کی فضائی کمپنی ’’ال عال ‘‘ کے مسافر طیارے بھارت اور کئی دوسرے ممالک کے لیے اومان کی فضاء سے گزر سکیں گے۔
خیال رہے کہ اومان کی طرف سے اسرائیل کو اپنی فضاء استعمال کرنے کی اجازت ایک ایسے وقت میں دی ہے جب خلیجی ممالک نے اسرائیل کے ساتھ تعلقات کے قیام کی کوششیں تیز کردی ہیں۔
دو ماہ قبل اسرائیلی وزیراعظم بنجمن نیتن یاھو ایک اعلیٰ سطحی وفد کے ہمراہ اومان کا ایک روزہ دورے بھی کر چکے ہیں۔ ان کے اس دورے پر عرب اور فلسطینی عوامی حلقوں میں سخت غم وغصے کی فضاء پائی جا رہی ہے۔
سوموار کو تل ابیب میں سفیروں کی ایک کانفرنس سے خطاب میں نیتن یاھو نے کہا کہ ہمیں اسی طرح سعودی عرب کی طرف سے بھی اپنی فضاء استعمال کرنے کی اجازت کی ضرورت ہے تاکہ اسرائیل فضائی کمپنیاں بھارت اور مشرق بعید کے فضائی سفر کے لیے ان ممالک کی فضاء سے گزر سکیں۔
انہوں نے کہا کہ اومان کی طرف سے اپنی فضاء استعمال کرنے کی اجازت اہم پیش رفت ہے تاہم اگر سعودی عرب اپنی فضاء استعمال کرنے کی اجازت نہیں دیتا تو اس پیش رفت کا کوئی خاص فائدہ نہیں ہوگا۔