مقبوضہ بیت المقدس (روز نامہ قدس ۔آن لائن خبر رساں ادارہ) قدس مرکز نے ایک رپورٹ میں اعلان کیا ہے کہ بیت المقدس کو اسرائیل کا دارالحکومت تسلیم کرنے کے ٹرمپ کے اقدام کے بعد سے اب تک مقبوضہ فلسطین کے مختلف علاقوں میں تین سو پینتالیس فلسطینی شہید ہو چکے ہیں۔
روز نامہ قدس کو موصول ہونے والی اطلاعات کے مطابق قدس ریسرج سینٹر نے اپنی رپورٹ میں فلسطینیوں کے خلاف صیہونی حکومت کے جرائم میں آنے والی تیزی کی طرف اشارہ کرتے ہوئے کہا ہے کہ امریکی صدر ٹرمپ نے جب سے بیت المقدس کو اسرائیل کے دارالحکومت کی حیثیت سے تسلیم کیا ہے اس کے بعد سے اب تک مقبوضہ فلسطین کے مختلف علاقوں میں تین سو پینتالیس فلسطینی شہید ہو چکے ہیں جن میں اکہتر بچے شامل ہیں۔
چھ دسمبر دو ہزار سترہ کو امریکی صدر ٹرمپ نے اسرائیل کے دارالحکومت کی حیثیت سے بیت المقدس کو تسلیم کرنے کا اعلان کیا تھا جس پر مختلف عالمی شخصیات منجملہ یورپی یونین کے خارجہ امور کی سربراہ نے شدید تنقید کی تھی۔