اقوام متحدہ نے انکشاف کیا ہے کہ قابض اسرائیل کے یہودی آبادکاروں نے گذشتہ ماہ اکتوبر کے دوران مقبوضہ مغربی کنارے میں فلسطینیوں کے خلاف کم از کم 264 حملے کیے، جو سنہ2006ء سے اب تک ایک ماہ میں ہونے والے حملوں کی سب سے زیادہ تعداد ہے۔
اقوام متحدہ کے ادارہ برائے انسانی امور (اوچا) نے جمعہ کے روز اپنے بیان میں خبردار کیا کہ مغربی کنارے میں تشدد کی لہر خطرناک حد تک بڑھ چکی ہے۔ رپورٹ کے مطابق یہ حملے جن کے نتیجے میں فلسطینی شہید ہوئے، درجنوں زخمی ہوئے اور بے شمار مکانات و املاک تباہ ہوئیں، روزانہ اوسطاً آٹھ واقعات کی شکل میں سامنے آئے۔
ادارے نے بتایا کہ سنہ2006ء سے اب تک قابض اسرائیلی آبادکاروں کے ایسے نو ہزار چھ سو سے زائد حملے ریکارڈ کیے جا چکے ہیں۔ صرف رواں سال کے دوران ہی تقریباً پندرہ سو حملے ہوئے جو مجموعی تعداد کا پندرہ فیصد ہیں۔
اوچا کے مطابق تازہ اعداد و شمار ظاہر کرتے ہیں کہ قابض اسرائیلی فوج کے ہاتھوں رواں سال کے آغاز سے بدھ تک مغربی کنارے میں 42 فلسطینی بچے شہید کیے جا چکے ہیں۔
رپورٹ میں کہا گیا کہ اس سال مغربی کنارے میں قابض اسرائیلی فوج کے ہاتھوں شہید ہونے والے ہر پانچ فلسطینیوں میں سے ایک بچہ تھا، جو اسرائیلی درندگی اور منظم نسل کشی کی لرزہ خیز عکاسی کرتا ہے۔
یہ صہیونی حملے ایسے وقت میں جاری ہیں جب امریکہ کی ثالثی میں غزہ میں جنگ بندی معاہدہ عمل میں آ چکا ہے، جس کے نتیجے میں بیشتر جھڑپیں رک چکی ہیں اور قابض اسرائیل نے اپنے قیدی واپس حاصل کر لیے ہیں، مگر مغربی کنارے پر اس کی جارحیت بلا توقف جاری ہے۔
