(روزنامہ قدس ۔آن لائن خبر رساں ادارہ) مقبوضۃ فلسطین کی مزاحمتی تنظیم اسلامی جہاد نے جہاد آزادی فلسطین کو مزید تیز کرنے اور مزاحمتی سرگرمیوں میں مزید اضافے کا اعلان کرتےہوئے کہا ہے کہ فلسطین کی مکمل آزادی اور خود مختاری تک مزاحمت اور جہاد کا سفر جاری رہے گا۔
اسلامی جہاد کے سیاسی شعبے کی طرف سے مصر کے دارالحکومت قاہرہ میں جماعت کے سیکرٹری جنرل زیاد النخالہ کی زیر صدارت اسلامی جہاد اور حماس عہدیداران کے ساتھ ہونے والے اجلاس کے دوران کیے گئے فیصلوں کی تفصیلات جاری کردی گئیں ۔
اسلامی جہاد کی جانب سے جاری بیان میں جہاد آزادی فلسطین کو مزید تیز کرنے اور مزاحمتی سرگرمیوں میں مزید اضافے کا اعلان کرتے ہوئے کہا گیا ہے کہ جماعت فلسطین کی مکمل آزادی اور خود مختاری تک مزاحمت اور جہاد کا سفر جاری رکھے گی۔
بیان میں وادی اردن ، غرب اردن اور دیگر فلسطینی علاقوں میں صہیونی ریاست میں ضم کرنے کی مذموم سازشوں کی روک تھام کے لیے قومی سطح پر مشترکہ مزاحمتی حکمت عملی اختیار کرنے کی ضرورت پر زور دیتے ہوئے فلسطینی قوتوں میں اتحاد اور مصالحت کی ضرورت پر روشنی ڈالی ۔بیان میں مزید کہا گیا ہے کہ امریکی مدد سے فلسطینی قوم پرمسلط کردہ صہیونی پروگرام کے خلاف مزاحمت اور فلسطین کے ایک ایک چپے کی آزادی کے لیے پوری فلسطینی قوم کو مزاحمت کا راستہ اختیار کرنا ہوگا۔