(روزنامہ قدس ۔آنلائن خبر رساں ادارہ ) فلسطین پر قابض صیہونی ریاست کے بلدیہ کا عملہ پولیس کی بھاری نفری کے ہمراہ مقبوضہ بیت المقدس کے مضافاتی علاقے وادی الحمص پہنچ گئے، فلسطینیوں کے مزید 237 گھروں کو مسمار کرنے کی منصوبہ بندی کی۔
دستیاب ذرائع سے حاصل تفصیلات کے مطابق پیر کی شام صہیونی ریاست کے زیر انتظام بیت المقدس بلدیہ کے کارندے اسرائیلی پولیس کی بھاری نفری کے ہمراہ الحمص وادی کے علاقے بہارٹاون میں پہنچ گئے، اوران تمام 237 گھروں کی پیمائش کی جن کے بارے میں خدشہ ہے کہ آئندہ دنوں میں اسرائیلی انتظامیہ انکو مسمار کردے گی۔
وادی کی کمیٹی کے سربراہ حمادہ حمادہ کا کہنا تھا کہ قابض صہیونی ریاست علاقے کے مزید 237 گھروں کو مسمار کرنا چاہتی ہے اور اس کے لیے انہوں نے تیاریاں مکمل کر لی ہیں۔
انکا کہنا تھا کہ ان عمارتوں میں 500 سے زائد فلسطینی رہائش پزیر ہیں جن کو بے گھر کرنے کی تیاری کی جارہی ہے۔ انکا یہ بھی کہنا تھا کہ صہیونی حکام نے دھمکی دی ہے کہ ممکنہ طور پر مسمار کی جانے والی عمارتوں کے مالکان انکو خود گرادیں ورنہ صہیونی انتظامیہ خود حرکت میں آ جائے گی اور یہ عمارتیں گرانے کے عیوض رہائشیوں سے جرمانہ بھی طلب کرے گی۔
انہوں نے مزید بتایا کہ اسرائیلی انتظامیہ نے عمارتوں کے رہائشیوں کو 18 جولائی تک کی مہلت دی ہوئی ہے کہ اس سے قبل عمارتیں ڈھا دیں ورنہ انکو اپنی املاک کھونے کے ساتھ ساتھ جرمانہ بھی دینا ہوگا۔
ایک محتاط اندازے کے مطابق الحمص کی آبادی 6000 فلسطینیوں پر مشتمل ہے جن میں سے 500 کو جبری طور پر بے گھر کرنے کی کوشش کی جارہی ہے۔