(روزنامہ قدس ۔آن لائن خبر رساں ادارہ) فلسطین پر قابض صیہونی ریاست اسرائیل کی جانب سے اردنی شہریوں کی رہائی کی یقین دہانی پر فلسطینی نژاد اردنی دو شیزہ ھبہ اللبدی نے بھوک ہڑتال معطل کردی ۔
تفصیلات کے مطابق اردنی وزیرخارجہ ایمن الصفدی نے بتایا کہ اسرائیلی حکومت حراست میں لیے گئے دونوں اردنی شہریوں 24سالہ ھبہ اللبدی اور 28 سالہ عبدالرحمان مرعی کو رہا کرنے پر رضا مند ہوگیا ہے۔
ھبہ اللبدی کے وکیل نے بتایا کہ اردنی وزیرخارجہ کو اسرائیل کی جانب سے ان کے شہریوں کی آئندہ ماہ رہائی کی یقین دہانی پر ان کی موکلہ ھبہ اللبدی نے 42 روز سے جاری بھوک ہڑتال معطل کردی ہے۔ اسرائیلی حکام کی طرف سے کہا گیا ہے کہ اللبدی اور عبدالرحمان مرعی کو آئندہ جمعرات کو رہا کرنے کے بعد اردن روانہ کردیا جائے گا۔
واضح رہے کہ ھبہ اللبدی کواسرائیلی فوج نے دو ماہ قبل اس وقت حراست میں لیا تھا جب وہ اردن سے مقبوضہ مغربی کناے میں اپنے ایک عزیز کی شادی میں آئی تھیں۔ اس عرصے میں ایک دوسرے اردنی شہری اور کینسر کے مریض عبدالرحمان مرعی کو حراست میں لے لیا گیا تھا۔ ھبہ اللبدی نے بلا جواز حراست کے خلاف بہ طور احتجاج بھوک ہڑتال شروع کی تھی۔