مقبوضہ بیت المقدس (روز نامہ قدس ۔آن لائن خبر رساں ادارہ) اسرائیلی کنیسٹ کے اسپیکر ’’یولی اڈلچائن ‘‘ نے حکومت پر زور دیا ہے کہ وہ غرب اردن کے جنوبی شہر الخلیل پر مکمل قبضہ کرلے۔
روز نامہ قدس کو موصول ہونے والی اطلاعات کے مطابق عبرانی اخبار ’ ہارٹز ‘ نے رپورٹ میں بتایا ہے کہ اسرائیلی کنیسٹ کے اسپیکر نے اسرائیل کی انتہا پسند تنظیم ’’ام ٹرٹسو ‘‘ میں شمولیت کی تیاری شروع کی ہے۔ یہ گروپ الخلیل شہر کے انتہا پسندوں پرمشتمل ہے۔
عبرانی اخبار کے مطابق اڈلچائن نے ’’ لابی برائے ارض اسرائیل ‘‘ کے عنوان سے ایک کانفرنس کے دوران خطاب میں کہا کہ اسرائیلی حکومت کو چاہیے کہ وہ الخلیل شہر پراپنی بالادستی قائم کرلے۔
یہ کانفرنس ’’ صیہونی آباد کاری کی سپورٹ ‘‘ کے لیے منعقد کی گئی اور اس میں الخلیل اور غرب اردن میں صیہونی آباد کاری اور توسیع پسندی کے اقدامات کی حمایت کی۔
خیال رہے کہ الخلیل شہر اسرائیل کے توسیع پسندانہ اھداف میں شامل ہے۔ الخلیل شہر میں اب تک 20 بڑی صیہونی کالونیاں قائم کی جا چکی ہیں۔ حال ہی میں الخلیل کے قلب میں ایک کالونی قائم کی گئی جس میں 400 صیہونیوں کوغیرقانونی طورپر آباد کیا گیا ہے۔