اسرائیل کا الخلیل سے عالمی مبصرین اور امن فورس کو بے دخل کرنے کا فیصلہ

مقبوضہ بیت المقدس (روز نامہ قدس ۔آن لائن خبر رساں ادارہ) اسرائیلی وزیراعظم بنجمن نیتن یاھو نے مقبوضہ مغربی کنارےکے جنوبی شہر الخلیل میں تعیناتی عالمی امن فوج کے دستے اور مبصر مشن کو شہر سے نکال باہر کرنے کا فیصلہ کیا ہے۔

روز نامہ قدس کو موصول ہونے والی اطلاعات کے مطابق اسرائیلی وزیراعظم کی طرف سے جاری ایک بیان میں کہا گیا ہے کہ تاریخی شہر الخلیل میں عالمی امن فوج کو اسرائیل کے تحفظ کے لیے تعینات کیا گیا تھا مگر اب وہ ہمارے خلاف استعمال ہو رہا ہے۔ ہم الخلیل میں ایسے کسی مشن کو برداشت نہیں کریں گے جو ہمارے خلاف کام کرے۔

ادھر فلسطینی ایوان صدر کے ترجمان نبیل ابو ردینہ نے ایک بیان میں کہا ہے کہ اسرائیلی حکومت نے الخلیل میں عالمی امن مشن کی مدت میں توسیع سے انکار کردیا ہے۔ ترجمان نے اسرائیلی حکومت کے اس فیصلے کی شدید مذمت کرتے ہوئے اسے مستردکردیا ہے۔

خیال رہے کہ الخلیل غرب اردن کا سب سے بڑاور گنجان آبادشہر ہے جس میں 600 صیہونی آباد کار اور 2 لاکھ فلسطینی آباد ہیں۔