(روز نامہ قدس ۔آنلائن خبر رساں ادارہ )قابض اسرائیلی فوج کی جانب سے فلسطینی علاقوں میں رکاوٹیں کھڑی کرنے کا سلسلہ جاری،گزشتہ رات اسرائیلی فوج نے مغربی کنارے میں رام اللہ کے مغربی داخلی دروازے کو بند کردیا اور سڑک پر بیرئیر لگا دئیے ۔
تفصیلات کے مطابق قابض اسرائیلی فوج نے رام اللہ جانے والے مرکزی راستے کو رکاوٹیں لگا کر بند کردیا جس سے قریبی راستوں پر شدید ٹریفک جام ہوگئی اور مقامی لوگوں کو دشواری کا سامنا کرنا پڑ رہا ہے۔
علاقے میں موجود عینی شاہد نے اناضول خبر رساں ایجنسی کو بتایا کہ قابض صہیونی فوج نے رام اللہ کے مغرب میں فلسطینی گاوں کی جانب جاتی سڑک کو بند کر دیا اور گزرنے والی گاڑیوں کی تلاشی کے نام پر مقامی لوگوں کو ہراساں کرتے رہے۔
دوسری جانب قابض صہیونی فوج نے رام اللہ کے مغرب میں فلسطینی دیہاتوں میں متعدد کمرشل دوکانوں کی تلاشی لی اور سکیورٹی کیمرے ضبط کر لیے۔
یاد رہے کہ گزشتہ ہفتے رام اللہ میں ایک فدائی حملے کے نتیجے میں یہودی خاتون کی ہلاکت کے بعد اسرائیلی فوج نے رام اللہ میں حفاظتی اقدامات مزید سخت کردیئےہیں اور مقامی لوگوں کی زندگیوں کو اجیرن کردیا ہے۔