اسرائیلی کی جانب سے غزہ سامان کی ترسیل کے لیے استعمال کی جانے والی منطار کراسنگ کی بندش کے سبب ٹرک ڈرائیوروں کی ہڑتال دو ہفتے جاری رہنے کے بعد ختم کر دی گئی جس کے بعد سامان کے ٹرکوں نے کرم ابو سالم کے ذریعے غزہ سامان کی ترسیل دوبارہ شروع کردی ہے۔ خیال رہے کہ ٹرک ڈرائیورز نے منطار کراسنگ کی بندش کے بعد کرم ابو سالم کراسنگ کے ذریعے غزہ جانے سے انکار کررکھا تھا۔ واضح رہے کہ منطار کراسنگ کی بندش سے اہل غزہ جو پہلے ہی ضروریات زندگی کے سامان سے محروم تھے، کی مشکلات میں بے پناہ اضافہ ہوچکا ہے۔ ادھر منطار کراسنگ کے 40 کلومیٹر دور کرم ابو سالم کراسنگ کے ذریعے سامان کی ترسیل کی لاگت میں اضافے کے ساتھ ساتھ غزہ کی درآمدات میں مزید کمی آئے گی۔ تاہم اتوار کے روز سے ہڑتال کے خاتمے کے بعد آج سے اس کراسنگ کے ذریعے غزہ سامان کی ترسیل دوبارہ شروع کر دی گئی ہے۔ اس دوران غزہ کے پھولوں سے لدے دو ٹرک یورپ کے لیے بھی روانہ کیے گئے۔