اسرائیل کی قابض فوج نے مغربی کنارے میں بڑے پیمانے پر فلسطینیوں کی پکڑ دھکڑ مہم شروع کر دی اور صوریف اور الخلیل سے کم از کم آٹھ فلسطینیوں کو غیر قانونی طور پر گرفتار کر لیا ہے۔ صوریف شہر کے ذرائع نے ’’مرکز اطلاعات فلسطین‘‘ کو بتایا کہ ضلع الخلیل کے شمال مغربی شہر صوریف سے علی الصبح چار فلسطینی نوجوانوں کو اغوا کر لیا، ان نوجوانوں میں سے دو پہلے بھی اسرائیل جیلوں میں ظلم کی چکی پیس چکے ہیں، صہیونی فوج نے نوجوانوں کے گھر بھی منہدم کر دیے۔ ذرائع کے مطابق اغوا کیے جانے دو سابقہ اسیر 25 سالہ مصطفی الحیح، 25 سالہ انس الھور ہیں جبکہ دیگر دو نوجوان انٹرمیڈیٹ کے طالب علم 18 سالہ جہاد الھور اور 18 سالہ طارق اغنیمات ہیں۔ قابض اسرائیلی فوج نے نوجوانوں کو گرفتار کرنے سے پہلے ان کے گھروں کی تلاشی لی اور سارے گھر کو الٹ پلٹ کر رکھ دیا، اس دوران اہل خانہ کو کئی گھنٹے گھروں سے باہر نکالے رکھا گیا۔ الخلیل میں بھی اسرائیلی فوج نے چار نوجوانوں کو اغوا کر لیا۔ گرفتار شدگان میں 24 سالہ محمد موسی غنام، 24 سالہ محمد فلاح عشہ، 23 سالہ فادی مصطفی سدر اور 22 سالہ مصعب سمیح ابو اشخیدم شامل ہیں۔