مصر کی معروف علمی درسگاہ جامعہ الازھر کے سربراہ الشیخ ڈاکٹراحمد الطیب نے کہا ہے کہ فلسطینوں کی مالی اور معنوی امداد نہ صرف عرب ممالک اورمسلم دنیا پر فرض ہے بلکہ یہ ہر زندہ ضمیرانسان کی اخلاقی ذمہ داری ہے کہ وہ مظلوم فلسطینی عوام کی ہرممکن مدد کرے. مرکز اطلاعات فلسطین کے مطابق جامعہ ازھر کے سربراہ ڈاکٹر احمد الطیب نے ان خیالات کا اظہار انٹرنیشنل الدعوة کونسل ایک اجلاس سے خطاب کے دوران کیا. انہوں نے کہا کہ فلسطینیوں کے حقوق کے حصول میں مدد فراہم کرنا ہم سب کی اخلاقی ذمہ داری ہے. صرف بیانات کی حدتک نہیں بلکہ مسلم امہ اور عالمی برادری کو دامے درمے سخنے ہر سطح پر فلسطینیوں کی مدد جاری رکھنی چاہیے. ڈاکٹر احمد الطیب نے فلسطینیوں کے درمیان اتحاد اور یکجہتی کی ضرورت پر زور دیتے ہوئے کہا کہ صہیونی جرائم کے خلاف فلسطینیوں کی قربانیاں تب ہی رنگ لا سکتی ہیں جب وہ آپس میں اتحاد پیدا کریں. اس وقت فلسطینی قبلہ اول کی آزادی کے لیے فرنٹ لائن کا کردارادا کر رہے ہیں انہیں حکمت اور دانشمندی کا مظاہرہ کرنا چاہیے اور باہمی اختلافات اور گروہی مفادات سے بالاتر ہو کر اپنی صف بندی کرنی چاہیے. جامعہ ازھر کے سربراہ نے انسانی حقوق کی عالمی تنظیموں اور اقوام متحدہ سے بھی مطالبہ کیا کہ وہ فلسطینیوں کو ان کے حقوق دلانے کے لیے اپنی ذمہ داریاں پوری کریں.