عالمی قوانین اسرائیل کو لبنان کا جہاز روکنے کی اجازت نہیں دیتے: خضری

غزہ محاصرہ مخالف کمیٹی کے سربراہ اور فلسطینی رکن پارلیمان ڈاکٹر جمال خضری نے کہا ہے کہ اسرائیلی حکام کو طے شدہ پروگرام کے مطابق چند روز میں غزہ پہنچنے والے لبنان کے دو بحری جہازوں ’’مریم‘‘ اور ’’ناجی العلی‘‘ کو روکنے کا کوئی حق حاصل نہیں۔ خضری نے اپنے اخباری بیان میں کہا ہے کہ عالمی قوانین صہیونی ریاست کو دو بحری جہازوں پر حملے کی ہرگز اجازت نہیں دیتے۔ یہ دونوں جہاز عالمی بحری سفر کے قوانین کی پوری پاسداری کر رہے ہیں۔ انہوں نے کہا کہ ایسے جہاز، جن پر صرف انسانی ضروریات کی امدادی اشیا، رضاکار اور امریکی راہبات موجود ہیں، پر حملے کی اسرائیلی دھمکیوں سے یہ معلوم ہوتا ہے کہ انتہاء پسند یہودی فلسطینی قوم کے ساتھ اظہار یک جہتی کرنے والے ہر فرد سے جنگ کے لیے تیار ہے۔ فلسطینی قوم کی مخالفت میں اسرائیل کسی بھی قوم کے خلاف کھڑا ہو سکتا ہے۔ انہوں نے کہا کہ دنیا کے تمام ممالک کو غزہ کے ساتھ اظہار یک جہتی کرنے اور چار سال پر محیط 15 لاکھ فلسطینیوں کے ظالمانہ محاصرے کو توڑنے کا حق حاصل ہے۔ خضری نے کہا کہ نئی بحری جہازوں کی تحریک کی کوششوں سے معلوم ہوتا ہے کہ محاصرے میں نرمی کے اسرائیلی ارادوں سے کسی نے دھوکہ نہیں کھایا۔ انہوں نے کہا ’’فریڈم فلوٹیلا‘‘ کی طرح ان دو بحری جہازوں پر اسرائیلی حملے سے بھی خبردار کیا۔ محاصرہ مخالف کمیٹی کے سربراہ نے کہا کہ اسرائیل کا وجود غیر شرعی ہے اس نے ’’فریڈم فلوٹیلا پر حملہ کر کے عالمی سمندری قوانین کی کھلی توہین کی ہے‘‘ اس نے عالمی پانیوں میں رضاکاروں اور بحری جہاز ’’امید‘‘ پر حملہ کر کے بھی اپنا ظالمانہ چہرے سے پردہ اٹھا دیا ہے۔