(روز نامہ قدس ۔آنلائن خبر رساں ادارہ ) خلیجی ممالک کے اسرائیل کے ساتھ سفارتی تعلقات پر سخت ناپسندیدگی کا اظہا رکرنے والے ملک ترکی میں دس سال بعد صیہونی ریاست کا کارگو طیارہ پہنچا ہے جو کورونا وائرس سے بچاؤکا طبی سامان استنبول ایئرپورٹ سے نیویارک پہنچائے گا۔
صیہونی ریاست اسرائیل کے عبرانی زبان کے معروف اخبار یدیعوت آحارنوت میں شائع ہونے والی رپورٹ کے مطابق 2010 میں ترکی کی جانب سے مقبوضہ فلسطین کے محصور شہر غزہ کیلئے انسانی بنیادو ں پر امداد لے کر جانے والے فریڈم آف فلوٹیلا پر اسرائیلی بحریہ کے حملے کے بعد سے تعطل کا شکار تعلقات کے بعد گذشتہ روز اسرائیلی ایئر لائن کا کارگو طیارہ استنبول کے ایئرپورٹ پر اترا۔
واضح رہے کہ ترکی نے خلیجی ممالک متحدہ عرب امارات اور بحرین کے صیہونی ریاست کے ساتھ سفارتی تعلقات پر انتہائی ناپسندیدگی کا اظہار کیا تھا جبکہ ترک صدر نے اس پر اپنے سخت مؤقف کا اظہا رکرتےہوئے متحدہ عرب امارات سے اپنا سفیر واپس بلانے کا بھی اعلان کیا تھا۔