شام کے صدر بشار الاسد نے یورپی امدادی قافلے پر اسرائیلی جارحیت پر کڑی تنقید کرتے ہوئے اقوام متحدہ سے اسرائیلی وحشیانہ کارروائیاں رکوانے اور غزہ کا محاصرہ ختم کروانے کا مطالبہ کیا ہے۔ انہوں نے کہا کہ حالیہ صہیونی جارحیت سے انسانی زندگی ہر ایک پر جائز ہو گئی ہے ۔ عالمی قوانین و ضوابط کی کوئی حیثیت باقی نہیں رہی۔ شام کی نیوز ایجنسی ’’ سانا‘‘ کے مطابق پیر کے روز بشار الاسد نے امریکی سینیٹر باب کورکر کے استقبال کے دوران کہا کہ ایک ایسے وقت میں جب لوگ امن وسلامتی کے لیے کوششیں کر رہے تھے اسرائیل نے غزہ کا حصار توڑنے والے ان شہریوں کو قتل کر دیا اس نے انسانی حیات کے خاتمے کو جائز قرار دے دیا اور تمام عالمی قوانین کی خلاف ورزی بھی درست کر دی ہے۔ اسد نے کہا کہ اس سب کے باوجود اسرائیل کو اقوام متحدہ کی غیر محدود اور غیر مشروط حمایت حاصل رہے گی اس بات سے کوئی سروکار نہیں کہ وہ ان جارحیتوں میں علاقے میں کس قسم کی مصائب و مشکلات کا سبب بنتا ہے۔