شام کے دارالحکومت دمشق کے علاقے یرموک کیمپ میں نماز جمعہ کے بعد فلسطینی کمیونٹی کے ہزاروں افراد نے سڑکوں پر نکل کر فلسطینی اتھارٹی کے خلاف مظاہرہ کر کے محمود عباس کو عہدہ صدارت سے ہٹانے کا مطالبہ کیا۔ احتجاج میں شریک فلسطینیوں نے فلسطینی غیر آئینی صدر کے خلاف زبردست نعرے بازی کی۔ مظاہرین کا کہنا تھا کہ پناہ گزینوں کی واپسی اور القدس کو چھوڑنے پر مشتمل فلسطین کے مسلمہ حقوق سے دستبردار ہونے کے بعد محمود عباس اور ان کی اتھارٹی کے پاس حکومت کرنے کا کوئی اختیار باقی نہیں رہتا۔ خیال رہے کہ پانچ روز قبل عرب ٹی وی چینل ’’الجزیرہ‘‘ کی جانب سے فلسطینی اتھارٹی کی جانب سے اسرائیل کے ساتھ خفیہ مذاکرات میں فلسطینی حقوق سے دستبرداری کی پیش کش پر مشتمل 1600 سفارتی دستاویز منظر عام پر لانے کا عمل شروع ہونے کے بعد سے اندرون اور بیرون ملک فلسطینی عوام مغربی کنارے میں محمود عباس کے زیر انتظام فلسطینی اتھارٹی کے خلاف سراپا احتجاج ہیں، یورپی ممالک اور امریکا میں فلسطینی کمیونٹی کی جانب سے بھی محمود عباس کو عہدہ صدارات سے ہٹانے کے مطالبات سامنے آ چکے ہیں۔