مسجد اقصی کے امام شیخ یوسف ابو سنینہ نے اسرائیل کی طرف سے آزادی بحری بیڑے کو دھمکیاں دینے کی شدید الفاظ میں مذمت کرتے ہوئے اس بلا جواز محاصرے کے خاتمے کیلئے عرب اور اسلامی دنیا کی مشترکہ کوششوں پر زور دیا ہے- شیخ نے جمعہ کے خطبے کے دوران ان خیالات کا اظہار کیا- ابو سنینہ نے کہا کہ عرب اور مسلم امہ کو اس محاصرے کو ختم کرنے کیلئے ہر ممکنہ کوشش کرنی چاہئے کیونکہ اس محاصرے کی وجہ سے ہمارے غزہ وادی کے بھائی شدید تکلیف دہ حالات کا سامنا کر رہے ہیں – انہوں نے کہا کہ کوئی بھی قانون یا مذھب اس محاصرے کو جائز قرار نہیں دے سکتا- شیخ نے کہا کہ اسرائیل غزہ وادی کا محاصرہ کرکے، لوگوں کو قتل کرکے، انہیں بھوکا رکھ کے،گھر سے بے گھر کر کے آخر حاصل کیا کرنا چاہتا ہے، یہ سراسر ظلم ہے – انہوں نے بیت المقدس میں قائم جرمن سکول کی انتظامیہ کو بھی آڑھے ہاتھوں لیا جنہوں نے ایک خاتون ٹیچر کو حجاب پہننے کی پاداش میں سکول سے فارغ کردیا- انہوں نے کہا کہ سکول انتظامیہ کی طرف سے یہ فیصلہ نسلی تعصب اور عصبیت پر مبنی ہے-