شام کے صدر بشارلاسد اور ترک وزیراعظم رجب طیب ایردوان نے ایک بار پھر غزہ کا محاصرہ توڑنے کی غرض سے آنے والے امدادی قافلے پر اسرائیلی جارحیت کی شدید مذمت کرتے ہوئے کہا ہے کہ عالمی رضاکاروں پر اسرائیلی حملے کی اسے بھاری قیمت چکانا ہوگی۔ شہدا کا خون رائیگاں نہیں جائے گا اور ان کےخون کے ایک ایک قطرے کاحساب لیاجائے گا۔ پیر کے روز انقرہ میں ایک مشترکہ پریس کانفرنس سے خطاب کرتے ہوئے دونوں راہنماؤں نے کہاکہ "اسرائیل کا امدادی بحری بیڑےپر حملہ گھناؤنا جرم اور شرمناک اقدام ہے، اسرائیل کی طرف سے عالمی رضاکاروں پر حملہ مکمل منصوبہ بندی کے تحت کیا گیا جس کی پہلے سے اسرائیلی حکومت کی طرف سے منظوری دی جا چکی تھی”۔ شام کے صدر بشار الاسد نے اسرائیلی جارحیت کے باعث امدادی بیڑے میں سوار ترکی کے شہید ہونے والے رضاکاروں کی تعزیت کی۔ ان کا کہنا تھا کہ دکھ کی اس گھڑی میں شام کی عوام ترکی اور فلسطینی عوام کے ساتھ ہیں، کسی ترک شہری کواسرائیل کی طرف سے نشانہ بنائے جانے پر انہیں اتناہی دکھ ہے جتنا کسی شامی شہری، فلسطینی یا عرب شہری کی شہادت کا ہو سکتا ہے۔ انہوں نے کہا کہ شہداء کا ٹھکانہ جنت ہے اور ہم تمام شہداء قافلہ کی قربانیوں کی قبولیت کے لیے دعائیں جاری رکھتے ہوئے ان کے نقش قدم پرچلیں گے۔ شامی صدر نے مزید کہا کہ "ترکی نے ایک سوسال کی تاریخ تازہ کردی ہے، ترکی آج بھی فلسطینی عوام کی پشت پراسی طرح کھڑا ہے جس طرح ایک سو سال قبل خلافت عثمانیہ کے خلیفہ عبدالحمید دوم نے فلسطین کو یہودیوں کا وطن قراردینے کی مخالفت کی تھی۔ اس موقع پر ترک وزیراعظم طیب ایردوان نے کہا کہ امدادی بحری بیڑے پر اسرائیلی حملہ شرمناک اقدام اور گھناؤنا جرم ہے۔انہوں نے کہا کہ اسرائیل کی طرف سے امدادی جہاز پر حملے کے لیے اسرائیل کے دلائل کی کوئی حیثیت نہیں، صہیونی حکومت نے طے شدہ منصوبے کے تحت امدادی جہاز پر حملہ کیا۔ انہوں نے کہا کہ اسرائیل نہ صرف امدادی جہاز پرحملے کا مسلسل دفاع کر رہا ہے کہ بلکہ اس گھناؤنے جرم میں ملوث فوجیوں کو جنگی جرائم جاری رکھنے کے لیے ان کی حوصلہ افزائی کر رہا ہے۔ طیب ایردوان نے کہا کہ بحری بیڑے پراسرائیلی حملے کے خلاف عالمی سطح پر مذمت کافی نہیں بلکہ اس جنگی جرم کی آزادانہ تحقیقات کر کے مجرموں کو انصاف کے کٹہرے میں لایا جائے۔ انہوں نے کہا کہ اگر اسرائیل کے ان جرائم کی تحقیقات نہ کی گئیں تو فلسطینیوں انصاف فراہم نہیں کیا جاسکتا اور اگر فلسطینیوں کو انصاف فراہم نہ کیا گیا تو خطے میں امن کا خواب شرمندہ تعبیر نہیں ہوسکتا۔ ایردوان نے کہا کہ ان کا ملک ذاتی دلچسپی کے تحت اسرائیل کے خلاف اس کے جنگی جرائم کی تحقیقات کی کوششیں جاری رکھے گا۔ انہوں نے کہا کہ اسرائیل دنیا کی جھوٹی ریاست ہے اور اس کے تمام جھوٹ اور کذب بیانی کو عالمی سطح پر بے نقاب کرنے کی کوششیں جاری رکھیں گے۔