قابض اسرائیلی حکام نے مغربی کنارے میں فلسطینی مجلس قانون ساز کے دو اراکین محمد اسماعیل طل اور محمد مطلق ابو جحیشہ کو سعودی عرب فریضہ حج کی ادائیگی کے لیے سفر سے روک دیا ہے. مرکز اطلاعات فلسطین کے مطابق دونوں فلسطینی مجلس قانون ساز کے ممبران ہفتے کے روز غرب اردن میں اردن اور فلسطین کے درمیان رابطہ کے واحد ذریعے” شاہ حسین "پُل پر پر پہنچے جہاں صہیونی سیکیورٹی حکام نے انہیں روک لیا. رکن قانون ساز کونسل محمد اسماعیل طل نے مرکز اطلاعات فلسطین سے گفتگو کرتے ہوئے بتایا کہ وہ اپنی اہلیہ کے ہمراہ فریضہ حج کی ادائیگی کے لیے سعودی عرب جانا چاہتے تھے کہ شاہ حسین پل پر اسرائیلی بارڈر فورسز نے انہیں روک کر ان کا پاسپورٹ قبضے میں لے لیا. انہیں کچھ دیر حراست میں رکھنے کے بعد ان کا پاسپورٹ واپس کر دیا تاہم یہ کہہ کرآ گے جانے سے روک دیا کہ انہیں بیرون ملک سفر کی اجازت نہیں. دوسری جانب فلسطینی رکن قانون ساز کونسل ابو جحیشہ نے بھی اسرائیلی حکام کی طرف سے سعودی عرب سفر سے روکے جانے کی تصدیق کی ہے. ان کا کہنا ہے کہ صیہونی حکام نے ان کا پاسپورٹ ضبط کر لیا تھا تاہم انہیں اس کے اسباب نہیں بتائے گئے.