(روزنامہ قدس ۔آن لائن خبر رساں ادارہ) صہیونی فورسز قبلہ اول میں شر پسند عناصر کو سیکیورٹی فراہم کر کے ان کی سرپرستی کرتی ہے اور فلسطینیوں کو قبلہ اول میں نماز کی ادائیگی سے روکنے کے لیے تشددسمیت دیگر اشتعال انگیز حربے استعمال کرتی ہے۔
تفصیلات کے مطابق گذشتہ روز مقبوضہ بیت المقدس میں درجنوں صہیونی آباد کاروں نے صہیونی پولیس کی فول پروف سیکیورٹی میں مسجداقصٰی میں داخل ہو کر مسلمانوں کے قبلہ اول کی بے حرمتی کی، اس دوران صہیونی اہلکاروں نے شر پسند عناصر کو فلسطینی نمازیوں کے ساتھ بد سلوکی اور تشدد کے مواقعے فراہم کیے جبکہ صہیونی انتہا پسندوں کو مزعومہ ہیکل سلیمانی کے بارے میں مذہبی بریفنگ بھی دی گئی۔
واضح رہے کہ صہیونی آبادکار جمعہ اور ہفتہ کے علاوہ باقی تمام ایام میں مسجد اقصی پر دھاوے بولتے اور تلمودی تعلیمات کے مطابق مسجد اقصٰی کی حرمت کو پامال کرنے والے اشتعال انگیز اقدامات اور حرکات کرتے ہیں جس میں اسرائیلی سیکیورٹی ان کی سرپرستی کرتی ہے اور فلسطینیوں کو قبلہ اول میں نماز کی ادائیگی سے روکنے کے لیے تشددسمیت دیگر اشتعال انگیز حربے استعمال کرتی ہے۔