مقبوضہ فلسطین میں عربوں کو اراضی و املاک سے محروم کرنے کے کارروائیوں کی یاد میں 35 ویں یوم ارض کے موقع پر فلسطینی شہریوں نے بھوک ہڑتال کا اعلان کیا ہے۔ زمینوں پر قبضے، گھروں کی تباہی، خاندانوں کی جبری ہجرت اور امتیازی قوانین کے خلاف احتجاجی مظاہروں کا اعلان کیا گیا ہے۔ مقبوضہ فلسطین کے عرب عوام کی فالو اپ کمیٹی نے بتایا کہ 30 مارچ کو یوم ارض کی مناسبت سے سب سے بڑی تقریب گاؤں عرابہ بطوف میں منعقد کی جائے گی۔ مظاہروں کی منتظم کمیٹی کے مطابق لد، رملہ، یایا اور بالخصوص ضلع نقب کے گاؤں عراقیب میں اسرائیلی مظالم کے خلاف مختلف سرگرمیاں سرانجام دی جائیں گی۔ یوم ارض کے شہداء کے ساتھ اظہار یک جہتی میں سخنین، کفر کنا، وادی عارہ اور دیگر علاقوں میں فالو اپ کمیٹی کے زیر اہتمام خصوصی احتجاجی مظاہرے نکالے جائیں گے۔ کمیٹی نے اپنے بیان میں کہا کہ آئندہ چند روز میں اس دن کے حوالے سے تمام پروگراموں کی حتمی شکل دے دی جائے گی۔