مصری حکام نے شیخ قرضاوی کی جانب سے اہل غزہ کے لیے رفح کراسنگ کھولنے کے مطالبے کے کچھ دیر بعد غزہ کے باسیوں کے انتہائی نامساعد حالات کے پیش نظر رفح کراسنگ کھولنے اور مصر میں موجود فلسطینیوں کی غزہ واپسی کا اعلان کر دیا ہے۔ مصری ذرائع ابلاغ کے مطابق غزہ اور مصر کے مابین اس واحد کراسنگ کو جزوی طور پر سیکڑوں فلسطینیوں کے غزہ داخلے کے لیے کھولا جائے گا۔ مصر میں صدر حسنی مبارک کے خلاف عوامی احتجاج کے موقع پر سیکڑوں فلسطینیوں کو مصر میں روک لیا گیا تھا۔ باخبر ذرائع نے ’’مرکز اطلاعات فلسطین‘‘ کو بتایا کہ جزوی بندش کا خاتمہ کراسنگ کو مکمل طور پر کھولنے کا پیش خیمہ ہے جیسا کہ ماضی میں بھی ایسا ہوچکا ہے۔ یہ فیصلہ غزہ حکومت کی جانب سے مصر میں محاصرہ کا خاتمے کی طرف دار متعدد تنظیموں سے رابطے کے بعد کیا گیا ہے۔ ذرائع نے کہا کہ اس فیصلے سے مصر میں حالات کو پرامن بنانے میں بھی مدد ملے گی۔ دوسری جانب سرحد اور کراسنگز کے ڈائریکٹر ڈاکٹر غازی حمد نے بتایا کہ مصر نے جمعہ کی شام کو تین روز کے لیے کراسنگ کھولنے کی اجازت دی ہے جس کا مقصد صرف مصر میں موجود فلسطینیوں کی اپنے وطن واپس جانا ہے۔ انہوں نے کہا کہ تین دن کے بعد مصری حکام سے مستقل طور پر کراسنگ کھولنے کی بات چیت شروع کر دی جائے گی۔ خیال رہے کہ غزہ اور مصر کے درمیان 25 کلومیٹر سرحد ہے جس پر صرف ایک ’’رفح‘‘ راہداری ہے جس کو بھی مصر نے بند کر رکھا ہے۔ اس کے علاوہ غزہ کی مقبوضہ فلسطین (اسرائیل) سے ملحق طویل سرحد پر واقع پانچ کراسنگ میں سے بھی صرف ایک کراسنگ کھلی ہوئی ہے جہاں سے انتہائی محدود پیمانے پر سامان غزہ لایا جاتا ہے۔