یمنی صدر علی عبداللہ صالح نے کہا ہے کہ فلسطینیوں کا اصل وطن فلسطین ہی ہے جس کا دارالحکومت بیت المقدس ہونا چاہیے، یمن فلسطینیوں کے آزاد وطن اور ان کی تحریک آزادی کی بھرپور حمایت جاری رکھے گا۔ ان خیالات کا اظہار انہوں نے منگل کے روز اسلامی تحریک مزاحمت (حماس) کے سیاسی شعبے کے صدر خالد مشعل سے ملاقات کے دوران کیا۔ یمنی صدر نے فلسطینی جماعتوں کے درمیان مفاہمت کی اہمیت پر زور دیتے ہوئے کہا کہ موجودہ حالات اور وقت کا تقاضا ہے کہ تمام فلسطینی متحد ہوجائیں، فلسطینیوں کا اتحاد مسئلہ فلسطین کی بہترین خدمت ہے اور اس موقع کو ضائع کیا گیا تو فلسطین میں انتشار اور انارکی میں مزید اضافہ ہوگا جس کا فائدہ اسرائیل کو ہوگا اور مسئلہ فلسطین کو نقصان پہنچے گا۔ دوسری جانب خالد مشعل حماس کی جانب سے مفاہمت کے لیے اب تک کی جانے والی کوششوں سے یمنی سربراہ مملکت کو آگاہ کیا۔ خالد مشعل نے یمن کی جانب سے فلسطینی عوام کی مدد اور مسئلہ فلسطین کی حمایت جاری رکھنے پر یمنی صدر کا شکریہ ادا کیا۔
