برطانیہ کی مختلف تنظیموں کے الائنس نے غزہ جانے والے امدادی قافلے ’’فریڈم فلوٹیلا 2‘‘ میں شریک کا اعلان کردیا۔ گزشتہ سال غزہ کی جانب گامزن قافلے ’’فریڈم فلوٹیلا‘‘ پر اسرائیلی غارت گری کی یاد میں اس قافلے میں دنیا بھر کے ساحلوں سے 15 بحری جہاز امسال پھر غزہ کے لیے روانہ ہونگے۔ ترک کی معروف عالمی امدادی تنظیم آئی ایچ ایچ کی جانب سے مئی میں غزہ کی جانب دوسرے امدادی قافلے کا اعلان کیا گیا ہے جس میں دنیا بھر کے ممالک سے رضا کار شرکت کا اعلان کر رہے ہیں۔ برطانیہ میں انسانی حقوق کی 05 تنظیموں کے ایک الائنس نے بھی اہل غزہ کی نصرت کے لیے قافلے کے ساتھ غزہ جانے کا اعلان کردیا۔ ان تنظیموں میں فرینڈز آف اقصی، اسلامی انیشی ایٹو برطانیہ، سٹاپ وار الائنس اور فلسطینی فورم برطانیہ جیسی تنظیمں بھی شامل ہیں۔ فلسطینی فورم کے میڈیا کوآرڈینیٹر زاھر بیراوی نے بتایا کہ برطانوی الائنس قافلے میں مالی مدد فراہم کریگا اسی طرح ایک خصوصی جہاز پر برطانیہ کے درجنوں انسانی حقوق کے کارکن اور سیاستدان قافلے میں شریک ہونگے۔ انہوں نے فریڈم فلوٹیلا پر حملے کے متعلق اسرائیلی موقف کے اعادے پر بات کرتے ہوئے کہا کہ یہ بات عیاں ہے کہ اسرائیل عالمی قوانین کی ذرہ بھر پرواہ نہیں کرتا لہذا اس میں کوئی تعجب کی بات نہیں کہ اسرائیل اس مرتبہ پھر وہ ہی جرم دہرائے۔ خیال رہے کہ گزشتہ برس 31 مئی کو فریڈم فلوٹیلا میں شریک ترک جہاز ’’مرمرہ‘‘ پر اسرائیلی قتل عام میں 09 رضا کار جام شہادت نوش کر گئے تھے۔