پانچ سال سے اسرائیلی معاشی ناکہ بندی کی شکار غزہ کی پٹی میں 377 گردے کے مریض 25 اقسام کی دوائیوں کی عدم موجودگی کی بنا پر موت کے دہانے پر کھڑے ہیں۔ اس بات کا انکشاف یونیسیف کے نمائندوں کے ساتھ ایک اجلاس میں فلسطینی وزارت صحت کے ترجمان نے کیا۔ بین الاقوامی تعاون کے ڈائریکٹر جنرل ڈاکٹر محمد کاشف نے ورلڈ کڈنی ڈے کے موقع پر ڈاکٹر یونس عوض اللہ کی سربراہی میں اقوام متحدہ کے ادارے یونیسیف کے ترجمان وفد سے ملاقات میں بتایا اسرائیل کی جانب سے خوراک اور ادویات کی غزہ ترسیل روک دیے جانے کے سبب غزہ میں صحت اور خوراک کا بحران شدید ہوتا جا رہا ہے۔ اس موقع پر یونیسف کے وفد نے سنہ 2011 اور 2012 کے لیے ایک منصوبہ پیش کیا جس کے مطابق ماں کے دودھ پلانے، ولادت کے بعد ماں کے گھر کے دورے اور بچوں کی خوراک کی فراہمی کے تین پروجیکٹس پر عمل کیا جائے گا۔ اس موقع پر ڈاکٹر کاشف نے اقوام متحدہ کے بچوں سے متعلق فنڈ ’’یونیسف‘‘ کے وفد کا شکریہ ادا کیا اور فلسطینی بچوں کے حالات بہتر بنانے کے لیے مزید تعاون کا مطالبہ بھی کیا۔ فلسطینی وزارت صحت نے ناروے کی ایک کمیٹی سے ڈاکٹر کاشف کی ملاقات کے لیے بھی ایک اجلاس منعقد کیا جس میں ناروے کی جانب سے فلسطینی قوم کی مدد کے امور پر بات چیت کی گئی۔